BDI: Dështoi plani i Vuçiç-it dhe qeverisë monoetnike për ekstradim të ish-ushtarit të UÇK në Serbi
Ky reagim i BDI-së vjen dy ditë pasi që Ramadani u arratis nga burgu shtëpiak në Shkup, pasi që mori vesh se i ishte ndryshuar masa e paraburgimit nga shtëpiak do të dërgohej përsëri në burg.
Nga partia që drejtohet nga Ali Ahmeti, po ashtu, kanë potencuar se dy liderët e koalicionit “VLEN” – pjesë e qeverisë së Hristjan Mickoskit – Izet Mexhiti dhe Arben Taravari, kanë “mashtruar opinionin publik” se është liruar Blerim Ramadani.
“Bashkimi Demokratik për Integrim vlerëson që dështoi plani i Vuçiç-it dhe qeverisë monoetnike për ekstradim të ish ushtarit të UÇK-së Blerim Ramadani nga Kosova i cili po përndiqet me urdhër të qeverisë serbe dhe ishte arrestuar në Shkup”, thuhet në reagim.
Mexhiti dhe Taravari, humbës të zgjedhjeve në taborin shqiptar dhe, sipas BDI-së, “vasalët e preferuar të VMRO-së, u krekosën që e kanë liruar Blerim Ramadanin, duke e mashtruar opinionin shqiptar”.
“Mickoski dje tha që Mexhiti e Taravari as nuk e kanë hap gojën në qeveri për Blerim Ramadanin dhe që nuk ka dëgjuar se janë lavdëruar për ‘lirimin’ e tij”.
Në prizmin e BDI-së, mungesa e legjitimitetit dhe “kredibilitetit të hyzmeçarëve në qeveri po i rrezikon ish ushtarët e UÇK-së, ndërsa po i lë shqiptarët jetim dhe të poshtëruar vetëm për hir të kolltukëve të hyzmeqarëve”.
“Poshtërimi i shqiptarëve është alarmant dhe skandaloz”, vlerësojnë nga partia më e madhe shqiptare në Maqedoni të Veriut.
BDI vazhdoi akuzat ndaj “VLEN”-it edhe në lidhje me incidentin e presidentes Vjosa Osmani në aeroportin e Shkupit, ku sigurimi i aeroportit, siç tregoi presidenca, ka tentuar t’ia marrë telefonin personal të parës së vendit dhe ta shyejë fizikisht.
“VazaLEN-ët po na turpërojnë edhe përpara Kosovës dhe Shqipërisë, përfshirë dhunimin e Presidentes Osmani dhe arrestimin e Blerim Ramadanit, të gjitha me urdhër të drejtpërdrejtë nga Vuçiç dhe Serbia”, potencon BDI.
Ndërsa, të premten, Këshilli Gjyqësor i Maqedonisë së Veriut në një mbledhje emergjente ka marrë vendim për formimin e një Komisioni që do të hetojë vendimet e Gjykatës Themelore Penale të Shkupit në lidhje me rastin e Blerim Ramadanit.
Kryetarja e Këshillit Gjyqësor, Vesna Dameva, duke treguar arsyet e formimit të këtij komisionit, ka theksuar se konsideron të nevojshme “si person i parë i Këshillit Gjyqësor që të formohet një komision dhe të konstatohet sa më parë gjendja faktike lidhur me këtë dhe të dalim me të dhëna konkrete para opinionit”.
“Diçka po ndodhte. Gjykata ka faj, nuk ka faj dhe mos paragjykojmë. Reagimi i Këshillit Gjyqësor në këtë moment, sipas kompetencës së tij, është të hetojë situatën”, ka thënë Dameva, raportojnë mediat në Shkup.
Komisioni përbëhet nga koordinatori i Gjykatës Themelore Penale Shkup, gjyqtari Aleksandër Kambovski, nënkryetari i Këshillit Gjyqësor Hanif Zendeli dhe anëtarja e Këshillit Gjyqësor Pavlina Cërvenkovska.
Dameva ka bërë të ditur se komisioni në fjalë do të përgatisë një raport ku mbi të cilin do të diskutohet dhe do të vendos Këshilli Gjyqësor.
“Pas konstatimit të gjendjes detyrohet Komisioni të përgatisë raport të cilin do ta dorëzojë në Këshillin Gjyqësor dhe për të cilin Këshilli Gjyqësor më tutje do të diskutojë dhe vendosë”, shtoi.
Ndryshe, Blerim Ramadani ishte arrestuar në pikën kufitare të Jazhincës, pasi që kishte flearrest nga Serbia.
Fillimisht, atij iu caktua masa e paraburgimit prej 30 ditësh, e cila më pas iu ndryshua me arrest shtëpiak.
Por, ky vendim përsëri u ndryshua, çka bëri që Ramadani të arratisej.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com-
Maliqi: Serbia marrëveshje me ShBA-në, BE-në e Francën, Kosova ka mbetur në nivelin e Krahinës Autonome Socialiste
-
Haradinaj: Osmani i kërkoi Biden-it që Kosova ta propozojë draft-statutin e Asociacionit, Kurti e pengoi
-
Haradinaj: Kurti me politikën e tij të “showbiz”-it e bëri Serbinë partner më serioz të aleatët tanë
-
“A jemi edhe ne në Kosovë”, një qytetari shqiptar nga Veriu i shkon fatura e rrymës në cirilikë
Lajmet kryesore
-
Amerika nënshkruan marrëveshje miliardëshe me Serbinë në fushën e energjisë
-
Anëtarësimi në SEPA, Sejko: Po punojmë me ekspertët e Bankës Botërore
-
Zbulohet lufta në hije e Rusisë kundër Izraelit: Nxit pakënaqësinë arabe, tensionon marrëdhëniet me jashtë
-
Haradinaj: Osmani i kërkoi Biden-it që Kosova ta propozojë draft-statutin e Asociacionit, Kurti e pengoi