“Shteti Sovran i Urdhrit Bektashi”, Rama për NYT: Një shtet i ri mysliman brenda Tiranës

Nëse gjithçka shkon siç është planifikuar, do të bëhet shteti më i vogël në botë.

Shteti mysliman brenda Tiranës do të jetë një enklavë sovrane e stilit të Vatikanit, por që do të lejojë alkoolin, do t’i lejojë gratë të veshin çfarë të duan dhe të mos vendosin rregulla të stilit të jetesës.

Kështu shkruan New York Times, e cila ka zhvilluar një intervistë me kreun e komitetit Bektashinj në Shqipëri, Baba Mondi.

“Zoti nuk ndalon asgjë; prandaj na dha mendjen”, tha Baba Mondi, duke shpjeguar se si synon të sundojë mbi një tokë prej 27 hektarësh që Shqipëria dëshiron ta kthejë në një shtet sovran me administratën e saj, pasaportat dhe kufijtë.

Kryeministri shqiptar, Edi Rama, deklaroi se në të ardhmen e afërt do të shpallë planet për entitetin, që do të quhet Shteti Sovran i Urdhrit Bektashi.

“Të gjitha vendimet do të merren me dashuri dhe dashamirësi”, tha Baba Mondi, 65 vjeç, një ish-oficer i Ushtrisë Shqiptare, i cili nderohet nga miliona në mbarë botën me titullin e tij zyrtar, Shenjtëria e Tij.

Ai është udhëheqësi kryesor i Bektashinjve, një rend sufi shiit i themeluar në shekullin e XIII-të në Turqi, por tani me qendër në Shqipëri.

Në intervistë me NYT, kryeministri Rama tha se qëllimi i shtetit të ri ishte të promovonte një version tolerant të Islamit me të cilin krenohet Shqipëria.

“Ne duhet të kujdesemi për këtë thesar, që është toleranca fetare dhe që nuk duhet ta marrim kurrë si të mirëqenë”, tha ai.

Territori i shtetit të ri islamik të propozuar është një kompleks në një lagje banimi me qira të ulët në Tiranën lindore.

Është vetëm një e katërta e madhësisë së qytetit të Vatikanit, aktualisht vendi më i vogël në botë, i qeverisur nga Papa, një monark absolut.

Baba Mondi tha se “madhësia nuk ka rëndësi”.

“Unë nuk kam nevojë të jem diktator”, megjithëse pranoi se i vetmi kufizim domethënës në autoritetin e tij do të jetë Zoti.

Mbetet e paqartë se cilat vende do ta njohin sovranitetin e këtij shteti të ri, dhe ndjenja e dyshimit është e pranishme, veçanërisht nga vende si Irani.

Kryeministri thekson se marrëdhëniet me Iranin nuk janë prioritet, pas ndërprerjes për shkak të lidhjeve me një sulm kibernetik.

Nga ana tjetër Baba Mondi është angazhuar prej kohësh kundër ekstremizmit, duke marrë pjesë në protestat pas sulmit të vitit 2015 në Charlie Hebdo.

Plani për Shtetin Bektashi do të përfshijë një shërbim të vogël inteligjence, pa ushtri, kufij të rreptë apo gjykata.

Pasaportat do të jenë të gjelbra, një ngjyrë e rëndësishme në Islam, por ende nuk ka detaje për ata që do të jenë të kualifikuar për to.

Baba Mondi ka premtuar se nuk do të ketë ambicie territoriale, duke e fokusuar këtë projekt si një çështje shpirtërore, jo pronësore.

Rama ka shpjeguar se kufijtë e shtetit të ri do të përcaktohen nga toka që Bektashitë e kanë aktualisht, duke shmangur konfliktet mbi pronat.

Baba Mondi e quajti këtë plan një “mrekulli” dhe shpreson për njohjen nga SHBA-të dhe fuqitë perëndimore.

Numri i besimtarëve Bektashi është i paqartë, me të dhëna që variojnë nga disa për qind të popullsisë shqiptare deri në shifra më të larta.

Disa besimtarë e shohin këtë plan si mundësi për të forcuar tolerancën dhe për të ruajtur identitetin fetar, veçanërisht për brezat e rinj.

Nuri Ceni, një historian, e konsideron si një dhuratë të rëndësishme për Shqipërinë.

Rama pranon se realizimi i këtij plani do të kërkojë kohë dhe është i gatshëm për të përballuar skeptikët, duke theksuar rëndësinë e luftës për vlera pozitive.

Numri një i Qeverisë shprehet se ideja mund të duket e çmendur për disa, por është i përkushtuar ta realizojë si një model të bashkëjetesës dhe paqes, duke shpresuar se do të forcojë vlerat e moderuara të Bektashizmit dhe do të ndihmojë në mbajtjen e identitetit kulturor dhe fetar shqiptar.