Stërvitja “Corridor VIII Response” thekson rëndësinë strategjike të Shqipërisë në NATO, thotë Vëngu
Ministri i Mbrojtjes, Pirro Vëngu, ka njoftuar mbërritjen në vendin tonë “Ex Austere Wolf – AW24”, një pjesë përbërëse e trupave të “Corridor VIII Response” në Shqipëri.
Vëngu shkruan se “Korridori VIII” është një aktivitet që thekson rëndësinë strategjike të Shqipërisë në NATO si pjesë e Ballkanit Perëndimor.
Ndërkaq Qeveria këtë javë miratoi vendimin që lejon pjesëmarrjen e 825 trupave ushtarake të Britanisë së Madhe në stërvitjen e përbashkët dypalëshe “Corridor VIII Response”.
Qëllimi i pjesëmarrjes të Forcave të Armatosura është demonstrimi i aftësive të Forcave të Armatosura të Republikës së Shqipërisë për koordinimin, sigurimin e teatrit të zbarkimit, pritjen dhe shoqërimin e forcave britanike në territorin e Republikës së Shqipërisë.
Stërvitja zhvillohet në periudhën 18 shtator -13 tetor 2024, në afërsi të Bazës Detare të Pashalimanit, sipas teknikave amfibe dhe në Portin e Durrësit për trupat e Strategic Reserve Force (SRF).
Trupat britanikë gjatë hyrjes, qëndrimit dhe daljes nga territori i Republikës së Shqipërisë do të kenë statusin e parashikuar në marrëveshjen ndërmjet palëve të Traktatit të Atlantikut të Veriut, për statusin e forcave të tyre, nënshkruar në Londër, më 19 qershor 1951, dhe ratifikuar nga Kuvendi i Republikës së Shqipërisë.
Gjatë hyrjes, qëndrimit e daljes nga territori i Shqipërisë trupat britanikë shoqërohen nga njësi të armatosura të Forcave të Armatosura të vendit tonë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com