Miratimi i rëndësishëm i Taylor Swift: Unë do të votoj për Kamala Harris

Sapo mbaroi debati, erdhi miratimi i Taylor Swift për Kamala Harris.

Me një postim në Instagram – i cili në pak më pak se gjysmë ore mori më shumë se 2 milionë pëlqime – këngëtarja e shpalli zgjedhjen e saj me një deklaratë të gjatë.

“Si shumë prej jush, edhe unë e pashë debatin sonte”, shkruan ajo duke iu drejtuar 283 milionë ndjekësve të saj.

“Nëse nuk e keni bërë tashmë këtë, tani është koha ideale për të bërë kërkimin tuaj mbi çështjet në fjalë dhe pozicionet e dy kandidatëve. Si votues shikoj dhe lexoj gjithçka që mundem për politikat dhe planet e propozuara për këtë vend”.

Më pas mohimi për mbështetjen e supozuar të saj për ish-presidentin amerikan.

“Kohët e fundit mësova se në faqen e tij u publikua që ‘unë’ e mbështesja në mënyrë të rreme kandidimin presidencial të Donald Trump. Me të vërtetë ngjalli frikën time për Inteligjencën Artificiale dhe rreziqet e përhapjes së dezinformatave. Kjo më ka çuar në përfundimin se duhet të jem shumë transparent në lidhje me synimet e mia për këto zgjedhje si votues”.

Pra, këtu është zgjedhja: “Unë do të votoj për Kamala Harris dhe Tim Walz në zgjedhjet presidenciale të 2024-ës”.

“Unë votoj për Kamala Harris sepse ajo lufton për të drejtat dhe sepse besoj se ne kemi nevojë për një luftëtare për t’i mbrojtur ato. Mendoj se ajo është një lidere e talentuar dhe e qëndrueshme dhe besoj se mund të arrijmë shumë më tepër në këtë vend nëse udhëhiqemi nga qetësia dhe jo kaosi”.

Taylor Swift përfundon duke i ftuar njerëzit të regjistrohen për të votuar (madje paraprakisht) dhe duke shkruar: “Unë bëra kërkimin tim dhe bëra zgjedhjen time. Varet nga ju që të bëni tuajën”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.