Deputeti nga radhët e Lidhjes Demokratike të Kosovës (LDK), Avdullah Hoti, ka thënë qeverisja e binomit: kryeministrit Albin Kurti dhe Presidentes Vjosa Osmani, e ka kthyer Kosovën nga një vend me sfida për zhvillimin ekonomik dhe integrime euro-atlantike, në një çështje të sigurisë për aleatët.
Këto komente, Hoti i ka bërë përmes një postimi në Facebook, duke komentuar vizitën e Shefit të CIA-s në Kosovë, William Burns, të enjten dhe të premten.
“Nga shpallja e pavarësisë, kemi punuar shumë qeveri pas qeverie për ta hequr Kosovën nga lista e vendeve me probleme të sigurisë. Në bashkëpunim të ngushtë me aleatët, janë marrë vendime të vështira dhe jopopullore, por që e përafronin Kosovën me perëndimin”, shkroi Hoti.
Ish-kryeministri rikujtoi se merrnim njohje të reja, anëtarësoheshim në mekanizma ndërkombëtarë, bëheshim pjesë e iniciativave rajonale e ndërkombëtare, “duke e betonuar hap pas hapi të ardhmen euro-atlantike të Kosovës”.
“Stabiliteti politik, integrimi i brendshëm i komuniteteve, normalizimi i marrëdhënieve rajonale e veprime të tjera i siguronin Kosovës zhvillim ekonomik e progres në rrugën e integrimit euro-atlantik”.
“Rrjedhimisht, arritëm që Kosovës ta hiqnim nga lista e vendeve me probleme të sigurisë dhe ta vendosim në listën e vendeve me sfida për zhvillim ekonomik e për anëtarësim në BE dhe NATO. Jam i bindur se kjo ka qenë politika më e mençur për integrimin euro-atlantik të Kosovës”, theksoi ai.
“Për fat të keq të popullit të Kosovës”, vlerëson Hoti, “dogmat politike të Kurtit e Osmanit dhe konfrontimi i tyre me aleatët-garantuesit e sovranitetit të Kosovës për rendin e veprimeve në Veri e kthyen Kosovën në çështje të sigurisë për NATO-n dhe BE-në, si dhe për aleatin kryesor të Kosovës, SHBA-në”.
Sigurisht, pohon ai, se këtë situatë e përdori Serbia me tendencë për të krijuar një vatër të re krize në Evropë, siç dëshmohet me sulmin terrorist të 24 shtatorit 2023.
“Rrjedhimisht, shefi i CIA-s detyrohet të zbarkojë në Prishtinë. Ai do të duhej të zbarkonte në Bosnjë dhe Serbi, por jo në Kosovë. Kosova do të duhej të kryente të gjitha koordinimet me SHBA-në siç ka vepruar gjithmonë, përmes Ambasadorit në Prishtinë, me Departamentin e Shtetit e me Shtëpinë e Bardhë”.
Në Kosovë, në prizmin e Hotit, do të duhej të zbarkonin kompani amerikane e evropiane për projekte zhvillimore të autostradave e hekurudhave, të gazit, të projekteve private në fusha nga më të ndryshmet, të gjitha këto të parapara në Marrëveshjen e Uashingtonit të 4 shtatorit 2020 e në Marrëveshjen për Nxitje të Investimeve Kosovë-SHBA të 31 dhjetorit 2020.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
