Si parashikoi Nixon një luftë në Ukrainë në vitin 1994

Një muaj para se të vdiste në vitin 1994, ish-presidenti amerikan Richard Nixon i shkroi një letër presidentit të atëhershëm Bill Clinton duke ofruar këshilla, veçanërisht për Rusinë, duke thënë se nëse do të kishte një konflikt në Ukrainë, lufta në Bosnjë dhe Hercegovinë do të dukej si një “festë kopshti”.

Përmbajtja e letrës u publikua nga Biblioteka Presidenciale Clinton dhe profesori i historisë Luke Nichter foli për përmbajtjen e saj për botimin amerikan “Wall Street Journal”.

Në një letër shtatëfaqëshe të datës 21 mars 1994, Nixon dha një vlerësim të qartë të situatës politike në Rusi, duke parashikuar me saktësi se marrëdhëniet midis Moskës dhe Kievit do të përkeqësoheshin dhe se dikush si Putini do të vinte në pushtet, tha Nichter.

Nixon, i cili në atë kohë ishte 81 vjeç, e shkroi letrën pasi u kthye nga një udhëtim dyjavor në Rusi dhe Ukrainë, raporton WSJ-ja.

Nixon e konsideroi mbijetesën e lirive politike dhe ekonomike në Rusi si “çështjen më të rëndësishme të politikës së jashtme” me të cilën do të përballej kombi në shekullin e 20-të.

Duke e kuptuar këtë, ai i tha Clinton-it se, bazuar në atë që kishte parë në Rusi, demokracia e re nën ish-presidentin rus Boris Yeltsin ishte “në rrezik”.

Në letër, Nixon parashikoi se marrëdhëniet midis Moskës dhe Kievit do të prisheshin dhe ai e quajti situatën në Ukrainë “jashtëzakonisht të ndezshme”.

Ish-presidenti më pas e këshilloi Clinton-in të forconte praninë diplomatike amerikane në Kiev dhe ai gjithashtu bëri thirrje për të zhvilluar marrëdhënie me pasardhësit e mundshëm politikë të Yeltsin-it.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.