Quajeni “Dame” Jacinda Ardern

Jacinda Ardern iu dha titulli “Dame” të hënën për shërbimin ndaj Zelandës së Re, katër muaj pas përfundimit të mandatit të saj si kryeministre, gjatë të cilit ajo u bë fytyra globale e një marke të dhembshur të politikës liberale.

Lajmi u bë i ditur nga gazeta amerikane “The New York Times”.

Çmimi – Dame Grand Companion i Urdhrit të Meritës së Zelandës së Re – është i dyti më i lartë në vend.

Ajo është dhënë si pjesë e një tradite vjetore të dhënies së nderimeve për festën e Ditëlindjes së Mbretit.

Të nderuarit zakonisht zgjidhen nga kryeministri dhe miratohen nga monarku britanik, Mbreti Charles III, i cili është kreu i shtetit të Zelandës së Re.

Ardern u shpreh se ishte “e përulur” nga çmimi dhe fillimisht kishte menduar ta refuzonte atë.

“Shumë nga gjërat që kemi kaluar si komb gjatë pesë viteve të fundit kanë të bëjnë me të gjithë ne dhe jo me një individ”, tha ajo në një deklaratë, duke shtuar, “për mua kjo është një mënyrë për të thënë faleminderit – për mua, familjes, kolegëve të mi dhe njerëzve që më mbështetën për të marrë rolin më sfidues dhe shpërblyes të jetës sime”.

Ish-kryeministrja, e cila tani mund të vetëquhet si Dame Jacinda Ardern, u njoh pjesërisht për rolin e saj në përgjigjen e vendit ndaj sulmeve terroriste vdekjeprurëse në qytetin e Christchurch në mars 2019 dhe pandemisë së Coronavirus-it.

Në janar, Ardern, 42 vjeç, tha se do të largohej nga detyra, një njoftim i papritur që erdhi nëntë muaj përpara zgjedhjeve të përgjithshme.

Ajo përmendi rraskapitjen si shkak, duke thënë se nuk kishte më “depozitën e plotë plus pak rezervë” të nevojshme për rolin.

Vendimi erdhi pasi Partia e saj Laburiste e qendrës së majtë po përballej me vështirësi në votime.

Që prej dorëheqjes, Ardern ka vazhduar të punojë për reagimin e qeverisë së Zelandës së Re ndaj ekstremizmit dhe terrorizmit në internet, në një kapacitet të papaguar.

Ajo është gjithashtu anëtare e bordit të çmimit mjedisor Earthshot të Princit William dhe më vonë këtë vit do të fillojë dy bursa në Universitetin e Harvardit.

Ardern bashkohet me paraardhësit e saj të menjëhershëm si kryeministre – Sir Bill English dhe Sir John Key – duke u bërë anëtare e Urdhrit të Meritës.

Nderimi kryesor i vendit, Urdhri i Zelandës së Re, iu dha të hënën mbretëreshës Camilla, në përputhje me traditën në Zelandën e Re.

Anëtarët e atij urdhri, i cili është i kufizuar në 20 marrës, përfshijnë dy ish-kryeministra, Helen Clark dhe Jim Bolger.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.