Konjufca: Kuvendi i Kosovës më transparenti krahas vendeve të rajonit

Kryetari i Kuvendit të Kosovës, Glauk Konjufca, ka thënë se institucioni që drejton është me nivelin më të lartë të transparencës ndër vendet e rajonit.

Pa treguar statistikat apo burimin e krahasimit, Konjufca ka thënë se kjo është shumë e rëndësishme.

“Për neve është e çmueshme për arsye se ne i realizojmë objektivat tona që janë për interesin e qytetarit të Kosovës, kështu që për këto vite si institucion përfaqësues Kuvendi ka arritur që duke përfshirë shoqërinë civile ta kthejmë në nivelin e transparencës e që është ndër vendet e para në rajon. Ky takim le të na shërbejë si nevojë për diskutim për atë se çka është arritur deri tash”, tha Konjufca.

Konjufca bëri të ditur se demokracia parlamentare është baza e zhvillimit të sistemit politik, duke shtuar se roli i Kuvendit për zhvillimin e vendit është qendrore.

“Ka qenë takim i nevojshëm dhe i rëndësishëm për Kuvendin e Kosovës, për shkak se unë besoj se demokracia parlamentare është baza e zhvillimit tonë dhe sistemit tonë politik. Meqenëse edhe me Kushtetutë ne jemi demokraci parlamentare, roli i Kuvendit për zhvillimin e vendit është qendror”, ka thënë Konjufca gjatë një takimi me organizatat partnere të Kuvendit të Kosovës.

Ai ka treguar edhe për fushat integruese që ka arritur Kuvendi i Kosovës.

“Në fushën integruese janë forcuar kapacitetet me njësi të reja si Qendra Burimore për Integrime Evropiane, kurse në agjendën globale, Kuvendi i Kosovës si vend vullnetarë është një ndër vendet e pakta që e ka edhe këshillin për zhvillim të qëndrueshëm, dhe që katër vite është pjesë e rrjetit parlamentar kundër korrupsionit”, ka thënë ai.

Ndërsa ka shtuar se Kuvendi i Kosovës zhvillon 13 projekte të partneritetit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.