Gjatë takimit të zhvilluar në Washington, Sekretari Amerikan i Shtetit, Antony Blinken i ravijëzoi Përfaqësuesit të Lartë të BE-së për Punët e Jashtme dhe Sigurinë dhe Nënkryetarin e Komisionit Evropian, Josep Borrell, se bisedimet e pranimit me Shqipërinë dhe Maqedoninë e Veriut – duhet të shkojnë përpara.
Detajet e bisedimeve mes të dy zyrtarëve u zbuluan nga zëdhënësi i Departamentit Amerikan të Shtetit, Ned Price, në faqen zyrtare të DASH-it, të enjten e 14 tetorit.
Blinken shprehu vlerësimin për mbështetjen e vazhdueshme që Bashkimi Evropian ka pasur në perspektivën evropiane të Ballkanit Perëndimor – referuar procesit të zgjerimit.
“Sekretari Amerikan ripohoi rëndësinë e qëndrueshme të partneritetit SHBA-BE dhe angazhimin e Shteteve të Bashkuara për të punuar së bashku me BE-në për t’u përballur me sfidat e përbashkëta”, shkruhet fillimisht në deklaratë.
Had great discussion with EU High Representative @JosepBorrellF today about the vital partnership between the United States and the EU to confront global challenges and the need for close coordination on critical issues such as climate, COVID-19, security, and defense. pic.twitter.com/qmvUhZqISu
— Secretary Antony Blinken (@SecBlinken) October 14, 2021
Ndër të tjera, dy zyrtarët e lartë diskutuan në lidhje me zhvillimet në Afganistan. Kjo, në prag të nisjes së Dialogut të Nivelit të Lartë SHBA-BE mbi Rusinë dhe takimit tjetër të nivelit të lartë të Dialogut SHBA-BE mbi Kinën, i cili do të ndodhë më vonë gjatë vitit.
Blinken mirëpriti strategjinë e BE-së për Indo-Paqësorin dhe u dakordësua për nisjen e konsultimeve të nivelit të lartë mbi Indo-Paqësorin në fund të vitit 2021.
Sekretari falënderoi gjithashtu Përfaqësuesin e Lartë për rolin e Shërbimit Evropian të Veprimit të Jashtëm në takimin e parë të suksesshëm të Këshillit të Tregtisë dhe Teknologjisë SHBA-BE.
Lidhur me rritjen e çmimeve të energjisë dhe efektin e tyre në rimëkëmbjen ekonomike globale, zyrtarët ranë dakord të mbanin një takim ministror të Këshillit të Energjisë SHBA-BE në fillim të vitit 2022.
“Sekretari riafirmoi mbështetjen e Shteteve të Bashkuara për një BE më të fortë dhe më të aftë që kontribuon pozitivisht në sigurinë transatlantike dhe globale dhe është në përputhje me NATO-n”, shkruhet më tej.
Në përmbyllje deklarata zbulon se Blinken dhe Borrell nënvizuan synimin e tyre për të nisur një dialog të dedikuar për sigurinë dhe mbrojtjen, siç ishte rënë dakord në Samitin e Qershorit SHBA-BE.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
