Zyrtari kinez flet kundër SHBA-ve për Tajvanin

Në fjalimin e tij të parë ndërkombëtar që nga pushtimi rus i Ukrainës, ministri kinez i Mbrojtjes Wei Fenghe e konsideroi ndjekjen e pavarësisë së Tajvan-it si “një rrugë drejt vdekjes”.

Ndërsa autoritetet amerikane kanë thënë se nuk e mbështesin pavarësinë e Tajvan-it, Wei Fenghe theksoi se nëse ishulli shpall pavarësinë nga Kina, Pekin-i padyshim do të shkojë në luftë.

Nga Tajvani në Ukrainë, në terma të qartë ose të nënkuptuar, Wei i vuri sytë nga Washingtoni të dielën e 12 qershorit, shkruan Politico.

Zyrtari i lartë dyfishoi gatishmërinë e ushtrisë kineze për luftë dhe i qëndroi besnik linjës delikate pro-Kremlinit të Pekinit.

Deklaratat e ashpra ishin një surprizë edhe për disa ekspertë të Kinës që morën pjesë në konferencën e Dialogut Shangri-La në Singapor.

Fjalët e Wei Fenghe-s erdhën një ditë pasi kolegu i tij amerikan Lloyd Austin e quajti Kinën një “burim jostabiliteti” në rajonin Indo-Paqësor, vijon revista Politico.

Është e rëndësishme të theksohet se Wei u detyrua të deklaronte se Kina “nuk i furnizoi asnjë armë” Rusisë për të zhvilluar luftë kundër Ukrainës.

Ai gjithashtu iu referua vazhdimisht si “luftë” gjatë sesionit të pyetjeve dhe përgjigjeve, duke shkuar përtej përcaktimit të zakonshëm “konflikt”.

Sipas ministrit kinez të Mbrojtjes, pasojat e luftës prekën Ukrainën, Rusinë, Kinën, Evropën dhe vendin pritës të forumit – Singaporin. Ai nuk përmendi emrin e SHBA-ve.

“Kush qëndron pas kësaj [lufte në Ukrainë]? Kush përfiton më shumë? … Kush i shton benzinë ​​zjarrit?”, shtoi ai.

Në vend që t’i kërkonte Rusisë të tërheqë trupat e saj, Wei deklaroi se ishte koha që SHBA-të dhe NATO të bisedonin me Rusinë për të “krijuar kushtet për një armëpushim të hershëm”.

Wei ruajti mesazhin e tij më të pakompromis për Tajvanin.

“Ata që kërkojnë pavarësinë e Tajvanit në një përpjekje për të ndarë Kinën definitivisht nuk do të arrijnë asgjë të mirë. Askush nuk duhet të nënvlerësojë kurrë vendosmërinë dhe aftësinë e ushtrisë kineze për të mbrojtur integritetin e saj territorial”, theksoi zyrtari kinez.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.