Shqipëria

Zyrtare: Këlliçi konfirmon kandidaturën për kryebashkiak


Deputeti i Partisë Demokratike, Belind Këlliçi do të jetë kandidatura e parë (ende jozyrtare) e opozitës për kryebashkiakun e ri të Tiranës.

Kjo kandidaturë do duhet të kalojë fillimisht përmes primareve për të shkuar drejt zgjedhjeve vendore të fiksuara më 14 maj.

“Unë kandidoj në këto primare për zgjedhjet vendore, pasi besoj se për të administruar Tiranën duhet të fitosh si fillim besimin e forcës politike ku adreson, të anëtarëve dhe simpatizantëve të saj. Në ndryshim nga Erion Veliaj, ecuria ime në politikë është vetëm nëpërmjet garës dhe votës së lirë”, u shpreh fillimisht përfaqësuesi demokrat.

Sipas tij, Veliaj kërkon të shfrytëzojë këtë pushtet dhe i duhet bashkia për një mandat të tretë.

“E kam të papranueshme të mbetem një dëshmitar okular i kësaj katastrofe në Tiranë. Të rinjve këtu u duhen tre jetë për të blerë një apartament. Veliaj është i vetmi njeri që mund të ketë konkuruar Ramën për abuzim me detyrën, për instalimin e një modeli të mbrapshtë. Ai dhe modeli i tij duhet larguar një orë e më parë”, theksoi Këlliçi.

Këlliçi është i gatshëm të lërë mandatin në Kuvend për të garuar përballë Erion Veliajt, për kreun e Bashkisë së Tiranës.

Lajmin se Këlliçi është i gatshëm të garojë, e ka përshëndetur edhe vetë kryedemokrati Sali Berisha.

Kjo, gjatë një konference për media, me rastin e nënshkrimit të marrëveshjes me Partinë e Lirisë, për bashkëpunim në vendoret 2023.

Megjithatë, pavarësisht deklaratave, një emër konkret për rivalin e Veliajt, ende nuk është bërë publik.

Sipas ish-kryeministrit, asgjë nuk është e caktuar, për sa kohë primaret janë në fuqi.

Ndaj, Këlliçi është i mirëpritur të garojë në primare për kreun e demokratëve, por ai duhet të kalojë në garë si gjithë të tjerët.

Marrëveshja

Kryetari i Partisë Demokratike (PD), Sali Berisha ka nënshkruar marrëveshjen me kryetarin e Partisë së Lirisë (PL), Ilir Meta për zgjedhjet lokale që do të zhvillohen më 14 maj.

Në marrëveshje thuhet se konkurrimi për kryetarët e bashkive do të bëhet me kandidatë të përbashkët, të cilët vendosen nga rezultati i konkurrimit në primare, që do të organizohen nga Partia Demokratike.

Referendumi, tregon marrëveshja do të jetë angazhim madhor i dy partive.

Gjithashtu nënvizohet se këshillat bashkiakë, si institucionet më të rëndësishme të përfaqësimit të qytetarëve, do të drejtohen nga përfaqësues të propozuar nga Partia e Lirisë, në rastet kur këshilltarët e kësaj të fundit rezultojnë përcaktues në sigurimin e shumicës në këta këshilla.

Pas nënshkrimit të marrëveshjes, kryedemokrati tha se mbështet fuqimisht nismën e referendumit të propozuar nga Ilir Meta duke thënë se do të kthejë demokracinë në vend.

“Të marrë fund kryetaro-kracia dhe qytetarët e Tiranës të zgjedhën të parët me praktikat më demokratike që ekzistojnë sot. Metës i kam garantuar se PD do të mbështesë nismën referendare. Referendumi dhe demokracia direkte është dhe mbetet mjeti më kryesor për të shëruar e për të kthyer demokracinë në Shqipëri”.

Ai shtoi se ky bashkëpunim do i çojnë në fitoren e sigurt jo vetëm në Tiranë, por në të gjithë Shqipërinë.

“Ky moment shënon marrëveshjen për fitoren e sigurt të opozitës në Tiranë dhe Shqipëri. Ky moment çel rrugën, për t’u dhënë qytetarëve të Tiranës, qytetarin e parë, që ata meritojnë, që pasqyron vlerat, shpirtin, virtytet dhe moralin e tyre, dhe një lloj për të gjitha qytetet e Shqipërisë”.

Nga ana tjetër, Meta shprehu bindjes se opozita do të jetë fituese në Tiranë dhe në shumicën dërrmuese të bashkive në vend. Ai falënderoi Berishën për mbështetjen që i dha referendumeve.

“E konsideroj me bindje të plotë historike. Marrëveshja më parimore që i shërben demokracisë dhe rivendosjes së pluralizmit politik dhe llogaridhënies. I vendos të dyja partitë në drejtim të garantimit të demokracisë direkte për qytetarët shqiptarë”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore