ZPS kërkon të rrëzohet mocioni i mbrojtes së Thaçit për akuzat e reja: Nuk ka mangësi në to  

Zyra e Prokurorit të Specializuar në Gjykatën Speciale, përmes një shkrese të drejtuar gjyqtarit paraprak, ka pretenduar se në akuzat e reja për krime lufte në Semetishtë dhe Budakovë ndaj Hashim Thaçit, Kadri Veselit, Jakup Krasniqit e Rexhep Selimit, nuk ka defekte.

Në këtë kontekst Prokuroria ka kërkuar që të rrëzohet mocioni i parashtruar nga mbrojtja e Hashim Thaçit, ndaj akuzave të reja për krime lufte, ku thuhej se ato kanë mangësi.

“Në kundërshtim me pohimet e mbrojtjes së Thaçi-t, kërkesat e përcaktuara në nenin 38 (4) të Ligjit dhe rregullin 86 (3) të Rregullores janë përmbushur. Në të vërtetë, forma e ndryshimeve  është në përputhje me pretendimet e tjera në aktakuzë, të cilat gjyqtari i procedurës paraprake tashmë i ka konstatuar se janë mjaft të qarta dhe specifike”, ka pretenduar prokuroria.

Sipas tyre, Zyra e Prokurorit të Specializuar vëren se parashtresat e mbrojtjes së Thaçit në lidhje me paragrafin 93 të aktakuzës nuk kanë bazë ligjore dhe duhet të hidhen poshtë përfundimisht.

Tutje, thonë se në themel të tij, mocioni bazohet në parashtresa të përsëritura që tashmë janë shqyrtuar dhe refuzuar nga gjyqtari i procedurës paraprake.

“Ashtu si në parashtresat e mëparshme, Mbrojtja e Thaçit në mënyrë jo të duhur: (i) kërkon detaje provuese të cilat nuk ka nevojë të paraqiten në aktakuzë dhe që janë dhënë ose do të sigurohen në përputhje me kornizën përkatëse; dhe (ii) kundërshton disa pretendime të izoluara, pa marrë parasysh Aktakuzën në tërësi”, thuhet në këtë shkresë.

Lidhur me pretendimin e mbrojtjes se kryesit nuk janë identifikuar, prokuroria thotë se kryesit janë identifikuar mjaftueshëm dhe janë identifikuar sipas kategorive ose grupeve si anëtarë të Ushtrisë Çlirimtare të Kosovës (‘UÇK’), të lidhur me baza, shtabe, ngjarje të caktuara dhe periudha kohore, dhe në lidhje me Budakovën dhe Semetishtën, të referuara gjithashtu nga brigada dhe zona operative e UÇK-së.

“Përderisa Mbrojtja pretendon se asnjë kryes nuk është identifikuar në paragrafin 174, ajo injoron referencën për vendndodhjen përkatëse dhe pjesët e tjera të aktakuzës, të cilat, lexuar së bashku me paragrafin 174, identifikojnë mjaftueshëm autorët. Prandaj, duke pasur parasysh (i) informacionin e detajuar të ofruar, (ii) që krimet e akuzuara dhe mënyrat e përgjegjësisë nuk varen nga identitetet specifike të kryesve individualë, dhe (iii) natyra dhe shkalla e përgjithshme e krimeve të akuzuara në aktakuzë, detaje shtesë në lidhje me autorët nuk duhet të deklarohen dhe përbëjnë çështje provuese për gjykim”, ka pretenduar prokuroria.

Po ashtu, prokuroria thotë se viktimat janë identifikuar mjaftueshëm në ndryshimet në paragrafët 68, 93 dhe 105.

Sipas tyre, viktimat identifikohen sipas kategorive dhe grupeve në lidhje me numrin minimal të përafërt, vendndodhjen e ndalimit, periudhën kohore dhe të dhëna të tjera të rëndësishme për krimet.

Ndërkaq, thonë se disa viktima identifikohen gjithashtu me emër, përkatësi etnike dhe përkatësi (e perceptuar) politike.

“Duke marrë parasysh (i) informacionin e detajuar të dhënë, (ii) shkallën dhe natyrën e krimeve të akuzuara në aktakuzë, të cilat pretendohet se janë kryer kundër qindra viktimave dhe të drejtuara kundër një grupi ose kolektiviteti, dhe (iii) se kryerja fizike nuk pretendohet, detaje shtesë në lidhje me viktimat nuk duhet të deklarohen dhe përbëjnë çështje provuese për gjykim”, thuhet në shkresë të ZPS-së.

Tutje, sipas prokurorisë, vendndodhjet e krimeve janë identifikuar mjaftueshëm në ndryshimet në paragrafët 68, 105 dhe 157.

Prokuroria thotë se vendet e krimeve në Budakovë dhe Semetishtë janë identifikuar sipas fshatit, komunës dhe lidhjes së tyre me/përdorimin nga anëtarët e UÇK-së, duke përfshirë anëtarët e Brigadës 123 të Zonës Operative të Pashtrikut.

“Duke marrë parasysh (i) informacionin e detajuar të dhënë, (ii) shkallën dhe natyrën e krimeve të akuzuara, dhe (iii) faktin që nuk pretendohet për kryerje fizike, detaje shtesë në lidhje me vendndodhjet e krimeve nuk duhet të deklarohen dhe përbëjnë çështje provash për gjykim”, ka pretenduar prokuroria.

Në fund të shkresës, thuhet se si përmbledhje, të gjitha faktet materiale, përfshirë në lidhje me ndryshimet, janë deklaruar në aktakuzë me qartësi dhe specifikë të mjaftueshme për t’i mundësuar të akuzuarve të kuptojë plotësisht natyrën dhe shkakun e akuzave kundër tyre.

“Në përputhje me kornizën e vendosur, mbrojtja ka marrë dhe do të vazhdojë të marrë detajet e provave që mbështesin faktet materiale të deklaruara, duke përfshirë ato të kërkuara në mocion, duke siguruar kështu drejtësinë në procedurë”, ka pretenduar prokuroria.

Ndryshe, më 29 prill, Zyra e Prokurorit  të Specializuar ka dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit.

Prokuroria po pretendon se katër të akuzuarit kanë kryer krime lufte edhe në Gjilan, Budakovë e Semetishtë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.