Vrasja e 18-vjeçares nga oficeri ndez polemika në SHBA

Vrasja e një 18-vjeçare, të cilën e qëlloi një oficer i sigurisë pranë një shkolle të mesme në “Long Beach”, Kaliforni, këtë javë, ka shkaktuar zemërim te populli. Ata kanë ripërsëritur thirrjet që oficerët e armatosur të largohen nga shkollat.

Viktima, e identifikuar nga familja e saj si Manuela Rodriguez, u qëllua ndërsa ishte në një makinë në lëvizje të hënën pasdite.

Departamenti i policisë në “Long Beach” tha se një oficer i distriktit shkollor po voziste, kur pa një sherr midis Rodriguez dhe një vajze 15-vjeçare, që po ndodhte në rrugë nga shkolla e mesme Millikan dhe u përpoq të ndërhynte.

Rodriguez më pas hyri në një automjet, që filloi të largohej.

Në pamjet video që qarkulluan në mediat sociale, u duk se oficeri qëlloi mbi makinën, ndërsa largohej.

Plumbi i oficerit goditi 18-vjeçaren, e cila ishte gjithashtu nënë e një djali pesë muajsh.

Rodriguez, për të cilin policia thotë se u godit në pjesën e sipërme të trupit, u dërgua në spital në gjendje kritike.

Oficeri, i cili nuk është identifikuar, ishte i punësuar në distriktin shkollor. Rodriguez, e njohur si Mona, nuk ishte nxënëse e asaj shkolle.

Të shtënat në “Long Beach”, një qytet në jug të Los Angeles, ka nxitur dënimin e taktikave të oficerit.

“Që ky oficer të shkojë pas makinës dhe të fillojë të shtënat brenda makinës ishte krejtësisht kundër politikës, kundër stërvitjes dhe kundër sensit të shëndoshë”, tha Luis Carrillo, avokat i familjes së Rodriguez, për “The Guardian”.

Ai tha se nuk kishte të dhëna se dikush ishte i armatosur apo se paraqiste kërcënim për oficerin.

Më tej avokati bëri thirrje që oficeri i sigurisë të akuzohej për vrasje, ose vrasje me dashje, pasi “nuk duhet të ketë oficerë të armatosur që merren me fëmijë”.

Policia e “Long Beach” dhe prokurori i qarkut po hetojnë të shtënat.

Departamentet e policisë në të gjithë Shtetet e Bashkuara kanë miratuar gjithnjë e më shumë politika kundër të shtënave në automjete në lëvizje, duke pranuar se të shtënat në një makinë mund të rrezikojnë shumë publikun.

Udhëzimet federale i udhëzojnë oficerët që të qëllojnë drejt një drejtuesi nëse shoferi paraqet një kërcënim vdekjeprurës, që është i ndarë nga automjeti (siç është drejtimi i armës).

Praktikat më të mira diktojnë që oficerët duhet të dalin nga rruga e lëvizjes së automjeteve në vend që të qëllojnë, kanë thënë ekspertët.

Politika e përdorimit të forcës nga distrikti shkollor “Long Beach” për oficerët e saj thotë se ata “nuk duhet të qëllojnë në një automjet në lëvizje”, dhe se “nuk duhet të qëllojnë në një person që ikën”.

Disa kanë pyetur pse oficeri ishte përfshirë në një mosmarrëveshje jashtë godinës në një parking.

Një zëdhënës i distriktit shkollor tha se oficerët e tij “punojnë si në godinë, ashtu edhe në afërsi të saj për të siguruar nxënësit në shkollë”, dhe se oficeri ishte në detyrë dhe “po kryente detyrën e tij, për studentët që largoheshin nga shkolla e mesme Millikan”.

Oakland tani po lëviz për të hequr departamentin e tij të policisë nga shkollat, dhe bordi i shkollës në Los Angeles ka votuar për të shkurtuar numrin e policëve nëpër shkolla.

Raporti i barazisë racore në “Long Beach” rekomandoi vitin e kaluar që distrikti shkollor të ndërmarrë hapa për të “zvogëluar përdorimin e policisë shkollore” dhe për të “rishikuar modelet alternative”.

Një zëdhënës i shkollës tha se rrethi aktualisht punësonte nëntë oficerë të sigurisë në shkollë me orar të plotë dhe dy oficerë me kohë të pjesshme.

Audrena Redmond, bashkëthemeluese e “Black Lives Matter” , tha se grupi kishte luftuar për t’i hequr oficerët e armatosur nga shkollat ​​dhe për t’i riinvestuar ato burime në programe dhe nevoja të qenësishme të stafit, të tillë, si: këshilltarë, punonjës socialë dhe infermierë.

Redmond tha se ajo nuk donte të shihte që zyrtarët e shkollës të përgjigjeshin duke premtuar më shumë trajnime, por më tepër duke hequr armët krejtësisht nga godinat shkollore.

Prania e oficerëve të armatosur në shkolla ishte e dëmshme për studentët, ajo tha se, “i kriminalizon njerëzit. Normalizon të qenit policë që në moshë shumë të re”.

Më tej, ajo shtoi se nuk kishte asnjë justifikim për përgjigjen e dhunshme nga oficeri.

“Ata po bënin atë që ndodh mes fëmijëve, e cila po zihet dhe grindet dhe pastaj ai qëlloi një adoleshent nga distanca e afërt. Është e tmerrshme”.

Rafeul Chowdhury, 20 vjeç, babai i fëmijës së Rodriguez, tha se ajo ishte në makinë kur u qëllua.

“Ishte e gjitha pa asnjë arsye. Mënyra sesi ai qëlloi mbi ne, nuk ishte e drejtë”.

Ai shtoi se, “unë thjesht dua drejtësi për vajzën time, nënën time, dashurinë e jetës sime që nuk mund ta kthej më kurrë”.

Carrillo, avokati i familjes, tha se njerëzit nga i gjithë komuniteti ishin mbledhur për një vigjilje për të kërkuar drejtësi për Rodriguez.

Jill Baker, mbikëqyrësi i shkollës në “Long Beach”, tha në një deklaratë se, “oficerët tanë të sigurisë në shkollë janë punësuar për të mbrojtur sigurinë fizike të stafit dhe studentëve tanë brenda dhe përreth godinës. Ata janë shumë të trajnuar dhe mbajnë përgjegjësi ndaj standardeve të përcaktuara në profesionin e tyre. Ato standarde do të përdoren për të vlerësuar incidentin që ndodhi”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.