Për javë të tëra në Austri kanë qarkulluar zëra se cili nga zyrtarët e qeverisë do të jetë në lupën e drejtësisë për korrupsionin e kryer.
Të enjten e kaluar, hetimi arriti në nivelet më të larta të qeverisjes, ku dhe u bastis shtëpia e ministrit të Financave, Gernot Blumel. Ai është i dyshuari kryesor, në lidhje me një skandal të përfitimit të fondeve.
Sipas mediave austriake, kancelari Sebastian Kurz do të jetë personi i radhës që do të përballet me akuzat e Prokurorisë.
Kjo nuk është hera e parë që Austria përfshihet në një skandal të tillë. Në 2019-ën, qeveria e Kurz-it dha dorëheqjen pasi u gjend në një vorbull korrupsioni.
Skandali “Ibizagate” shpërtheu në 2019-ën, kur një kamera e fshehtë tregoi pamje të zyrtarëve në pushtet, që ishin të gatshëm të ndihmonin interesat ruse në këmbim të financimit.
Skandali i quajtur “Rasti i Kazinove”
Hetimi i fundit bazohet në dyshimin se një kompani bixhozi ka ofruar donacione për një parti politike dhe ka siguruar mbështetjen e zyrtarëve të Republikës së Austrisë.
Kompania Novomatic njihet si një nga kompanitë më të mëdha të lojërave të fatit, e cila është e përfshirë në hetim.
Një zëdhënës i Novomatic tha se pretendimet ishin “të rreme dhe të pasakta”.
“Viti i tersit për qeverinë austriake”
Me sa duket ky është viti i tersit për qeverinë austriake, e cila e nisi vitin me një dorëheqje nga ministri i Punës për plagjiaturë.
Ndërkohë të dhënat kanë treguar që ekonomia është një ndër më të goditurat në Evropë nga pandemia. Në fillim të shkurtit, një hetim zyrtar e vendosi inteligjencën austriake në tabelën e qitjes, për lejimin e një sulmi vdekjeprurës. Por, në sondazhet e zgjedhjeve kancelari mbetet ende i popullarizuar.
Këtë javë Kurz kaloi në mbrojtje, duke akuzuar prokurorët e premtuar se do të bëjë ndryshime. Ai shprehu dëshirën për të reformuar të gjithë sistemin e drejtësisë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com