Pas në kohë…
Në Shqipërinë e vitit 1958. Një djalë dhe një vajzë rriten së bashku në të njëjtin fshat.
Agimi, biri i tradhtarëve, të cilët u ndaluan nga qyteti nga komunistët dhe Luana, vajza e një njeriu shumë të respektuar, janë protagonistët e filmit shqiptar “Virgjëresha Shqiptare”.
Por, ai, protagonisti kryesor – që qëndron prapa kuintave dhe risolli traditat e një Shqipërie “të vjetër” – regjisori i mirënjohur, Bujar Alimani, në një prononcim për Albanian Post tregon emocionet për “krijesën” e tij, filmin “Virgjëresha Shqiptare”.
“Nuk mund ta shpreh sa krenar jam”, merr fill rrëfimi i Alimanit, “që më në fund po e publikojmë para botës”.
Sigurisht, kur pasioni për profesionin kthehet në një sukses, krenaria shtohet dyfish.
“Virgjëresha Shqiptare”, i prezantuar në Festivalin Ndërkombëtar në Varshavë, në edicionin e tij të 37-të, rrëmbeu dy çmime prestigjioze, si: Ecumenical nga SIGNIS (World Catholic Assocation Comunication) dhe INTERFILM (International Interchurch Film Organisation).
“Marrja e dy çmimeve, në premierën e parë, dëshmon për vlerat kualitative artistike dhe estetike të filmit. Filmi bëri premierë botërore dhe, mbi gjitha, arriti të komunikojë me publikun”, vijoi drejtori artistik.
- Filmi trajton temën e gruas dhe pështjellimin e mendimeve në situatat e vështira të jetës zakonore shqiptare, sipas Kanunit.
“Në të vërtetë”, shpjegon regjisori, “filmi nuk flet për Kanunin, por për femrën shqiptare në rrathët e Kodit Zanor të maleve, dhe se si dashuria, në çdo kuptim, e bën atë të hakmerret për drejtësi, por edhe të falë”.
Një nga elementët që e bën atë të afërt me publikun është trajtimi “plot ngjyrë dhe delikatesë i gjithë imazhit të filmit”.
Ngjarja, e vendosur në Shqipërinë e viteve ‘50-‘70, sjell kohën kur regjimi komunist po konsolidohej fort.
Atëherë kur ekzistenca e femrës, si personalitet i veçantë, me dëshirat dhe vendimet e saj njerëzore, ishte thuajse e pamundur.
Në fakt, siç pohon dhe vetë Alimani, “Virgjëresha Shqiptare” e përballi publikun me historitë e shkuara shqiptare, pikërisht me “historinë patriarkale”, që ndoshta në një cep të Shqipërisë ekzistojnë edhe sot.
“Ky film nuk gjykon apo ngre gishtin moral, por i paraqet ngjarjet në terma realë, siç mund të kishin ndodhur pikërisht atëherë në Shqipëri”, ravijëzon regjisori.
Për të njëjtësuar kohën e zgjedhur të filmit, vitet ’50-’70, regjisori ka menduar dhe i ka realizuar xhirimet në zona të ndryshme të Shqipërisë, me rrugë të vjetra.
“Në këtë mënyrë kujtojmë sfondin e viteve të largëta”.
Në vijim të rrëfimit, Alimani përcjell dhe mesazhin që mbart ky film “humanizmi dhe paqja”. Personazhi kryesor e “zgjedh jetën me çdo çmim”.
Rina Krasniqi, e cila në film mban rolin kryesor, atë të Luanës, zbulon për Albanian Post për gjithë përsiatjen e mendimeve, mes një kërkimi “shpirtëror, mental e intelektual”.
“Për të interpretuar këtë rol, kam kaluar në një fazë të gjatë, të thellë dhe mjaft të rëndë kërkimi shpirtëror dhe intelektual, nëpër amplituda të thella emotive”.
Një punë e palodhur, një punë që për t’u pasqyruar trajta origjinale, “më është dashur të kryej edhe transformime fizike”, thotë ajo.
Sipas Krasniqit, “storiet dhe historia e sakrificave të grave shqiptare dhe roli hyjnor i tyre në shoqërinë shqiptare janë elementet faktike determinuese për gjithë kombin”.
“Sot po manifestohen përmes sukseseve të kinematografisë”, përmbylli aktorja.
Në fund, drejtuesi artistik i filmit, duke folur për Albanian Post, jep mesazhin se ka shumë shpresë për kinematografinë dhe aktorët e rinj shqiptar.
“Besoj se është e domosdoshme tërheqja e më shumë përkujdesje e këtyre të rinjve në prodhimin Kinematografik shqiptar. Në qoftë se kinemaja shqiptare nuk shkëputet nga ndikimet e realizimit socialist, nuk do të ketë asnjë lloj drite në horizont”.
Më 15 tetor, në Tiranë, në Kinema Millenium, ishte edhe premiera e filmit “Virgjëresha Shqiptare”.
Një kastë e njohur aktorësh, si Viktor Zhusti, Nik Xhelilaj, Alban Ujkaj, Lulzim Zeqja, Gëzim Rudi, etj., si edhe këngët e Eda Zarit janë pjesë e filmit.
Pa diskutim, një sukses!
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com