Vdekja e Floyd-it, sipas mjekëve ligjorë shkak mungesa e oksigjenit

Në seancën e radhës të gjyqit ndaj ish-oficerit të policisë në Minneapolis, Derek Chautin, për vrasjen e afrikano-amerikanit George Floyd, të premten e 9 prillit, u tha se ai vdiq për shkak të mënyrës se si polici qëndroi mbi të.

Mjekja patologe, Dr. Lindsey Thomas, tha se “veprimi i ish-oficerit solli vdekjen e Floyd”. Vdekja, sipas saj, erdhi nga mungesa e oksigjenit.

Chauvin, 45 vjeç, u filmua i gjunjëzuar në qafën e Floyd për më shumë se nëntë minuta gjatë arrestimit të tij majin e vitit 2020.

Ish-oficeri po gjykohet për vrasje, ndërsa i ka mohuar akuzat kundër tij.

Pamjet e amerikanit të bardhë, Chauvin, me gju në qafën e një afrikano-amerikani shkaktoi protesta globale kundër racizmit.

Prokurorët po përpiqen të provojnë se përdorimi i forcës së Chauvin solli vdekjen e Floyd, ndërsa mbrojtja e Chauvin po kërkon të tregojë se ai ishte duke ndjekur trajnimin e tij dhe se ilaçet dhe sëmundjet e zemrës mund të kenë shkaktuar vdekjen e Floyd.

Të premten, prokuroria thirri gjithashtu Dr. Andrew Michael Baker, i cili kreu ekzaminimin ligjor pas vdekjes të Floyd.

Ai tha se vdekja e Floyd ishte për shkak të sjelljes së ish-oficerit. Por nuk e përjashtoi se përdorimi nga ana e tij të drogës dhe sëmundja e zemrës që kishte, gjithashtu luanin një rol.

Çfarë tha Dr. Thomas?

Autopsia zyrtare e Floyd nuk e përmend asfiksinë, por Dr. Thomas, besonte se kjo është arsyeja kryesore me të cilën ai vdiq.

Dr. Thomas shqyrtoi autopsinë e Floyd, raportet mjekësore dhe materiale të tjera në emër të prokurorisë. Ajo gjithashtu trajnoi Dr. Andreë Baker, kryeinspektorin mjekësor i cili lëshoi ​​certifikatën zyrtare të vdekjes së Floyd.

“Kjo nuk është një vdekje kardiake e papritur. Zemra dhe mushkëritë e tij ndaluan së punuari”.

Ajo tha se mushkëritë në trupin e Floyd nuk ishin në gjendje të merrnin oksigjenin e duhur me tre oficerë policie mbi të dhe ishte prangosur.

“Ajo që do të thotë është që veprimet e oficerëve, në krye të detyrës, sollën vdekjen e Floyd”.

Ajo tha se i përjashtonte shkaqet e tjera të mundshme të vdekjes. Duke përfshirë një mbidozë të ilaçeve, një sulm fatal në zemër dhe sëmundje të mushkërive.

Kur u pyet nëse çështjet themelore të shëndetit të Floyd dhe marrja e ilaçeve mund të çonte në një përfundim të arsyeshëm se ai vdiq nga sëmundja e zemrës, Dr. Thomas pohoi se nuk kishte kuptim të injoronte realitetin e “nënshtrimit, përmbajtjes dhe shtypjes” nga ana e policisë kundrejt Floyd.

Dëshmia e mjekut ligjor

Pas Dr. Thomas, prokuroria thirri Dr. Andrew Baker. Mjek i cili kreu ekzaminimin zyrtar pas vdekjes së Floyd.

Dr. Baker përsëriti konstatimin e tij fillestar se vdekja e Floyd ishte një “vrasje”, duke shtuar se ky ishte një klasifikim mjekësor – jo ligjor.

Kur u mor në pyetje nga mbrojtja, Dr. Baker pranoi barnat e gjetura në sistemin e Floyd dhe sëmundja e tij themelore e zemrës “luajti një rol” në vdekjen e tij – megjithëse jo shkaku.

Avokati i mbrojtjes, Eric Nelson, bëri disa pyetje në lidhje me përdorimin e drogës të Floyd dhe nivelet e fentanilit në gjakun e Floyd në kohën e vdekjes së tij.

“Në rrethana të tjera, do të ishte një nivel fatal”, por ai sqaroi se ishte “shumë i varur nga konteksti”.

Çfarë do të ndodhë më pas?

Gjyqi është në javën e tij të dytë dhe pritet të zgjasë të paktën një muaj.

Mbrojtja pritet të fillojë të argumentojë çështjen e saj në gjykatë javën e ardhshme.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.