Futbollisti i klubit të Llapit, Valmir Veliu, ka përfunduar në radarin e klubit turk, Trabzonspor.
Sipas asaj që raportojnë mediat në Turqi, drejtuesit e klubit të Trabzonspor-it kanë nisur bisedimet me menaxherin e futbollistit kosovar, Rahman Keçe.
Interesim për sulmuesin anësor kishte shprehur edhe klubi tjetër nga Turqia, Galatasaray, por së fundmi negociatat mes tyre nuk kanë vazhduar.
Kujtojmë që klubi i Trabzonspor-it po kalon momente fantastike në Ligën e Turqisë, të cilët i prijnë tabelës me 49 pikë, 10 më shumë se vendi i dytë, Konyaspor.
Sa i përket Veliut, ai këtë sezon ka shkëlqyer me fanellën e Llapit, i cili në 18 paraqitje në të gjitha garat, ka shënuar gjashtë gola dhe ka dhuruar po aq asistime.
Ai gjithashtu ka një paraqitje me kombëtaren A të Kosovës, ndërsa te grupmoshat U21 të Dardanëve, Veliu ka regjistruar tetë paraqitje, ku ka gjetur rrugën e rrjetës në një rast.
21 vjeçari, vlera e të cilit llogaritet rreth 400 mijë euro, së fundmi është zgjedhur edhe në formacionin më të mirë të vitit nga Federata e Futbollit të Kosovës.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com