Përgjatë ditës së mërkurë të 24 nëntorit, në të përditshmen sportive shqiptare “Panorama Sport” u publikua një artikull ku pretendohej se UEFA ka bllokuar llogaritë bankare të Federatës Shqiptare të Futbollit (FSHF).
Sipas artikullit, UEFA ka bllokuar llogaritë e FSHF-së, pas disa transaksioneve të dyshimta të kryera nga ky institucion.
I menjëhershëm ka qenë edhe reagimi i FSHF-së, duke e cilësuar artikullin si “shatnazh dhe përbaltje” e cila shitet si “profesionalizëm”.
“Federata Shqiptare e Futbollit informon se në artikullin e publikuar ditën e sotme nuk ka asnjë të vërtetë të vetme”, thuhet në deklaratën e FSHF-së.
“Llogaritë e FSHF-së në bankat e nivelit të dytë në vend nuk janë të bllokuara dhe kjo mund të vërtetohet lehtësisht nga kushdo”.
“Në të njëjtën kohë dëshirojmë të saktësojmë se në marrëdhëniet e Federatës së Futbollit me anëtarët e saj, në asnjë rast të vetëm, nuk ka pasur transfertë bankare në llogari private apo të dyshimtë, siç pretendon kjo media”.
“Çdo transfertë bankare është kryer në llogaritë zyrtare të klubeve. Institucioni i futbollit në vend është ndër të paktat institucione që të gjithë veprimtarinë financiare e kryen nëpërmjet sistemit bankar, duke qenë transparent dhe duke paguar çdo detyrim ndaj autoriteteve shtetërore”.
“Federata nuk ka asnjë konflikt apo detyrim ndaj asnjë Zyre Përmbarimore në Republikën e Shqipërisë dhe aq më pak të ketë ndonjë kolaps financiar siç pretendohet në fletërrufenë e sotme”.
“Federata Shqiptare e Futbollit është e përkushtuar për të vijuar misionin e saj për përmirësimin dhe rritjen e mëtejshme të futbollit shqiptar, duke përmirësuar infrastrukturën, duke punuar për futbollin e fëmijëve dhe femrave, për rritjen e kapaciteteve njerëzore në tregun e futbollit”, përfundon deklarata e institucionit më të lartë të futbollit në vend.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com