Turqia ka shtyrë pagesën e Rusisë për një faturë prej 600 milionë dollarësh të gazit natyror deri në vitin 2024, vonesa e parë e tillë në një marrëveshje të shpallur javën e kaluar që nënvizon thellimin e lidhjeve midis Ankarasë dhe Moskës.
Agjencia britanike “Reuters” shkruan për këtë duke iu referuar dy burimeve.
Sipas kushteve të marrëveshjes, deri në 4 miliardë dollarë pagesa turke për energjinë ndaj Rusisë mund të shtyhen deri në vitin e ardhshëm, thanë të dy burimet për Reuters në kushte anonimiteti.
Detajet e marrëveshjes nuk janë bërë të ditura më parë.
Turqia, e cila po përgatitet për zgjedhjet e së dielës, është shumë e varur nga importet e energjisë, me Rusinë si furnizuesin e saj më të madh.
“Marrëveshja e pagesës së gazit ul disi presionin mbi rezervat valutore të Turqisë, të cilat janë varfëruar nga politikat ekonomike joortodokse që synojnë mbështetjen e lirës, si dhe nga rritja e çmimeve të energjisë pas pushtimit rus të Ukrainës vitin e kaluar”, shkruan agjencia.
“Zyrtarisht pagesa prej 600 milionë dollarësh është shtyrë për vitin e ardhshëm. Ndikim të madh për këtë ka pasur edhe rritja e çmimit të energjisë”, tha një nga burimet e njohura me këtë çështje.
Bashkëbiseduesi shtoi se Turqia mund t’i shtyjë këto pagesa në muajt e ardhshëm, në varësi të dinamikës së çmimeve të energjisë.
Ministria ruse dhe turke e energjisë, si dhe kompanitë përkatëse të energjisë Gazprom dhe Botas, nuk iu përgjigjën kërkesave për koment mbi këtë çështje.
Ministri turk i Energjisë Fatih Donmez tha javën e kaluar se Ankaraja dhe Moska kishin arritur një marrëveshje që i lejon Ankarasë të shtyjë pagesat e energjisë deri në një shumë të caktuar, por nuk dha detaje.
Marrëveshja thekson lidhjet midis Rusisë dhe Turqisë dhe afërsia mes presidentëve Putin dhe Erdogan u lejon atyre të zhvillojnë negociata të shpeshta për çështje të ndryshme – nga energjia deri te luftërat në Ukrainë dhe Siri, kujton Reuters.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com-
Komisioni Hetimor për shëndetësinë përplas opozitën me mazhorancën sërish
-
Humbi zgjedhjet me rreth 40 mijë vota, Taravari s’tërhiqet: Vazhdojmë
-
“Afera e ambalazhuesve”, Selmanaj: Prokuroria urgjentisht të fillojë çmontimin e kësaj skeme korruptive dhe kriminale
-
Raketat Atacms kanë mbërritur tanimë në Kiev, në fshehtësi
Lajmet kryesore
-
Rama ‘letër publike’ Ranuccit: Hodhët një tjetër hap fals, fatkeqësi që bëni krahasime me Kremlinin
-
Osmani pas fitores: Vetëm fillimi i një kapitulli të ri për një të ardhme të ndritur
-
Miliarderët e botës duhet të paguajnë minimalisht 2% taksë mbi pasurinë, thonë ministrat e G20
-
O’Brien i kërkoi “përparim urgjent” për Asociacionin, Kurti s’e përmend askund