Tri punëtore të mediave janë qëlluar për vdekje në qytetin e Jalalabad-it, në Afganistanin Lindor.
Ato u vranë në dy sulme të ndara, pasi ishin duke u larguar nga redaksia ku punonin.
Televizioni lokal i Enikass TV tha se gratë e vrara ishin punonjëse të tij.
“Të gjithë kanë vdekur. Ato po shkonin nga zyra në shtëpi në këmbë kur u qëlluan”, tha Zelma Latifi, njëri prej drejtorëve.
Dy persona të tjerë u plagosën nga të shtënat.
Latifi tha se tre gratë ishin të sapodiplomuara të shkollës së mesme të moshës midis 18 dhe 20 vjeç.
Shefi i policisë së Nangarhar, Juma Gul Hemat, tha se një i dyshuar i armatosur më vonë u mor në paraburgim pas të shtënave, duke shtuar se autoritetet ishin ende në kërkim të fajtorëve të tjerë.
“Ne e arrestuam atë ndërsa po përpiqej të shpëtonte. Ai ka pranuar se ka kryer sulmin. Është anëtar i Talebanëve”, tha Hemat
Ndërkohë, zëdhënësi i Talebanëve, Zabihullah Mujahid, mohoi që grupi të kishte ndonjë dorë te vrasjet.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
