Emma Graham-Harrison, korrespondentja e britanikes “The Guardian”, ka bërë një reportazh të shkurtër mbi bazën sekrete të CIA-s amerikane, e cila është braktisur në kryeqytetin e Afganistanit, Kabul.
“Makinat, minibusët dhe automjetet e blinduara që CIA përdori për të zhvilluar luftën e saj në Afganistan ishin rreshtuar dhe djegur përtej identifikimit para se amerikanët të largoheshin”, përshkruan Graham-Harrison fillimisht.
Kompleksi që ajo ka fotografuar e raportuar ka qenë për 20 vjet selia e CIA-s.
“Ky vend ishte zemra e errët, e fshehtë e luftës kundër terrorit të Amerikës, një vend ku kanë ndodhur disa prej abuzimeve më të këqija në Afganistan”, shkruan më tej Graham-Harrison.
Në fshatin ku ndodhej baza e CIA-s u trajnuan forcat paraushtarake të lidhura me disa nga abuzimet më të këqija të të drejtave të njeriut gjatë luftës.
Deponia e madhe e municioneve, nënvizon korrespondentja, ishte hedhur në erë.
“Kompleksi i shpërndarë në dy kilometra katrorë në verilindje të aeroportit, u bë famëkeq për torturat dhe vrasjet në burgun e tij ‘Salt Pit’, i koduar nga CIA”, shton Graham-Harrison.
“Të ndalurit” e quanin “burgu i errët”, sepse nuk kishte dritë në qelitë e tyre, ndriçimi i vetëm i rastit, vinte nga fenerët e rojeve të tyre.
Baza ka qenë për dy dekada një vend diskret, i dukshëm vetëm përmes fotove satelitore ose nga dëshmitë e të mbijetuarve.
“Ne duam të tregojmë se si i kanë shpenzuar asetet që mund të ishin përdorur për të ndërtuar vendin tonë”, tha Mullah Hassanain, një komandant në njësinë elitare 313 të talebanëve për “The Guardian”.
Njësitë paramilitare që vepronin këtu, të bazuara në kazermat afër ish-burgut të Salt Pit-it, ishin disa nga më të frikshmit në vend.
Kazermat ishin braktisur aq shpejt sa burrat që jetonin atje e kishin lënë ushqimin gjysmë të përfunduar.
“Kryesisht ata kishin marrë ose shkatërruar objektet që përmbanin emra, ose grada”, ravijëzon Graham-Harrison.
Aty pranë, vendi i burgut të Salt Pit-it me sa duket ishte rrafshuar disa muaj më parë.
Një hetim satelitor i “New York Times” zbuloi se, që nga pranvera, një grup ndërtesash brenda kësaj pjese të kompleksit të CIA-s ishin rrafshuar.
Zyrtarët talebanë thanë se ata nuk kishin ndonjë hollësi në lidhje me Salt Pit-in, apo atë që kishte ndodhur me ish-burgun.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.comLajmet kryesore
-
Zgjerimi i BE-së: Sa afër anëtarësimit janë nëntë vendet kandidate?
-
Këshilli Bashkiak i Himarës cakton pasuesin e Jorgo Goros
-
Rusia e vendos Evropën në një udhëkryq: Sa do të kushtonte riarmatimi?
-
Hamza thotë se Kurti degradoi pozicionin e Kosovës në dialog, zotohet se do t’i shkëpusë serbët e veriut nga ndikimi i Serbisë