Në Maqedoninë e Veriut kanë mbërritur 3 mijë doza vaksina Sputnik V, nga Rusia.
Ministri i Shëndetësisë, Venko Filipçe, njoftoi se do të vaksinohen personat e moshuar me sëmundje të rënda kronike.
“Ne jemi gjithmonë të përgatitur që t’i ndihmojmë qytetarët e Maqedonisë. Ashtu siç dihet ‘Sputnik V’ është vaksina e parë e regjistruar kundër Covid-19. Vaksina është absolutisht e sigurt dhe efikase”, tha ambasadori rus në konferencën e përbashkët.
Kujtojmë se vaksinimi në Maqedoninë e Veriut filloi me 4 mijë e 680 dozat e Pfizer-it, nga 8 mijë dozat e parashikuara, që i dhuroi Serbia. Autoritetet shëndetësore kanë arritur të marrin edhe vaksina kineze “Sinofarm”.
Nga Rusia pritet t’i vijnë edhe 197 mijë doza të tjera të vaksinës anti-Covid.
Më herët, kryeministri i MV-së, Zoran Zaev, akuzoi shtetet fqinje se nuk po e ndihmojnë vendin siç kishin premtuar për dhurimin e vaksinës anti-Covid. Konkretisht, ai e kishte për Greqinë, Bullgarinë dhe Serbinë.
Ministrja e Punëve të Jashtme të Bullgarisë, Ekaterina Zaharieva, reagoi duke thënë se qeveria do t’i dhurojë dozën tjetër të vaksinave Maqedonisë së Veriut (MV) sapo të arrihet sasia e mjaftueshme nga Bashkimi Evropian (BE).
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
