S’ka hyrje në BE/ Shqiptarët, të dytët më të refuzuar

Rreth 140 mijë qytetarëve – jo të Bashkimit Evropian – u është mohuar hyrja në vendet e BE-së gjatë vitit 2020 dhe ndër ta, të dytët më të refuzuar, janë shqiptarët.

Sipas statistikave të publikuara nga Eurostat, ukrainasit janë të vetmit më të refuzuar përpara shqiptarëve.

Faktikisht, disniveli midis ukrainasve dhe pjesës tjetër është i madh. Janë 56 mijë e 370 refuzime, që kanë shkuar në dëm të ukrainasve.

Shqiptarët vijojnë me 13 mijë e 315 refuzime. Ndër vendet e rajonit, kjo është shumatorja më e lartë.

Për sa i përket Ballkanit Perëndimor, Bosnjë dhe Hercegovina ndjek me 8 mijë e 145 refuzime, Serbia me 7 mijë e 210 dhe Maqedonia e Veriut me 2 mijë e 415.

Më gjerë, moldavët janë refuzuar 10 mijë e 150 herë. Bjellorusët, edhe pse të sanksionuar, janë refuzuar 5 mijë e pesë herë. Rusët ndjekin me 4 mijë e 340 të refuzuar, turqit me 3 mijë e 760.

Ndërkohë, një numër shumë të lartë të refuzuarish jashtë kontinental, janë ata brazilianë me 2 mijë e 775 të tillë.

Pavarësisht numrit të lartë të ukrainasve jo të pranuar, ka një rënie krahasimore midis vitit 2019 dhe 2020. Nga 66 mijë në 2019-ën, shifra ka rënë në 56 mijë e 370 në 2020-ën.

More than 50,000 Ukrainians were stopped from entering the EU last year. pic.twitter.com/VGXgUObZWl

— Radio Free Europe/Radio Liberty (@RFERL) July 24, 2021

Për sa i përket vendeve të BE-së që refuzojnë më së shumti, Hungaria zë vendin e parë, me 26% të totalit të refuzimeve. Polonia ndjek me 20% të refuzimeve. 11% e totalit vjen nga kroatët dhe 43% ndahet midis shteteve të tjera.

Në bazë statistikore po nga Eurostat, shqiptarët janë ndër vendet me numrin më të lartë të azilkërkuesve në dhjetëvjeçarin e fundit. Rreth 200 mijë shqiptarë kanë kërkuar azil në vendet e BE-së gjatë viteve 2010-2019.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.