Në tetor të vitit 2022, titullarja e atëhershme e Home Office, Suella Braverman, nga radhët e Konservatorëve, do të zemëronte shumë qytetarë shqiptarë me komentet e saj.

“Nëse Laburistët do të ishin në krye, ata do të lejonin të gjithë kriminelët shqiptarë të vinin në këtë vend, do të lejonin të gjitha varkat e vogla të vinin në Britaninë e Madhe, do të hapnin kufijtë tanë dhe do të minonin totalisht besimin e popullit britanik në kontrollin e sovranitetit tonë”, shprehej ajo para deputetëve, ndërsa vijoi të përdorte gjuhë nxitëse kur tha se bregdeti jugor i Anglisë po “pushtohej nga azilkërkuesit”.

I menjëhershëm ishte reagimi i kreut të Qeverisë, Edi Rama, i cili e quajti veçimin e emigrantëve shqiptarë nga Braverman si një moment “të turpshëm” për politikën britanike.

Edi Rama deklaroi se komentet e Braverman-it për “kriminelët shqiptarë” që kaluan Kanalin me varka të vogla, mund të konsiderohen vetë krim.

“Fatkeqësisht, ne e kemi parë veten dhe komunitetin tonë duke u veçuar në këtë vend për qëllime politike. Ka qenë një moment shumë, shumë i turpshëm për politikën britanike”, pohonte kryeqeveritari për programin Today të BBC Radio 4.

Tre vite më pas, nën qeverisjen e Laburistëve me në krye Keir Starmer, komuniteti shqiptar në Britani vijon të synohet me keqdashje nga gazetat dhe OJQ-të e mbështetura prej krahut të djathtë në politikën e gadishullit britanik.

Më 5 janar, e përditshmja “The Telegraph” së bashku me gazetën “Daily Mail” dhe transmetuesin “GB News”, publikuan artikullin me titull “Të huajt kanë tre herë më shumë gjasa të arrestohen për shkelje seksuale sesa qytetarët britanikë”.

Fokusi i këtyre shkrimeve nxirrte në pah “analizën e parë të këtij lloji”, nga shifrat e aluduara të një think-tanku britanik, i cili vendoste “shqiptarët si kombësia me më shumë gjasë për t’u arrestuar, ndjekur nga afganët, irakianët, algjerianët, marokenët dhe somalezët”.

Bëhet fjalë për të ashtuquajturën “Centre for Migration Control” (Qendra për Kontrollin e Migracionit – ed.), të dhënat e të cilës ishin marrë nga forcat policore, Home Office dhe Zyra për Statistikat Kombëtare (ONS).

Por një gjë e tillë u hodh poshtë nga Home Office në një përgjigje zyrtare për Albanian Post.

“Statistikat e cituara në artikullin e The Telegraph janë prodhuar nga Qendra për Kontrollin e Migracionit dhe jo nga Home Office. Statistikat e arrestimeve të Home Office nuk përfshijnë informacion mbi kombësinë”, konfirmoi për Albanian Post një zyrtar nga Statistikat e Policisë për Home Office.

Faksimile e të dhënave të publikuara në artikujt e gazetave duke cituar "Home Office" — Faksimile e të dhënave të publikuara në artikujt e gazetave duke cituar si burim “Home Office”

Qendra për Kontrollin e Migracionit duket se nuk ekziston ende zyrtarisht si kompani, por ka një llogari aktive në X/Twitter dhe një faqe interneti, nga e cila gazetat e djathta kanë mundur të citojnë kërkimet e saj politike.

Faqja e saj e internetit nuk ka informacione për origjinën e grupit, mbështetësit apo financuesit e saj, por mburret me një faqe të mirëpajisur mediatike.

Një nga figurat e ekselencës shqiptare në jetën akademike britanike dhe jo vetëm, Dr. Andi Hoxhaj, i cili është Ligjërues në Drejtësi dhe Drejtor i Programit të Drejtësisë Evropiane në King’s College në Londër ka kontaktuar gjithashtu me CMC-në mbi këtë raport.

“E kam ndjekur si rast dhe i kam kërkuar Qendrës për Kontrollin e Migracionit (CMC) të ndajë raportin dhe nuk e kanë ndarë. Gjithashtu ju kam shkruar dhe mediave që ta ndanin raportin që ata citojnë”, zbulon fillimisht Doktori i Filozofisë në Drejtësi për Albanian Post.

“Unë në këtë rast, por dhe më gjerë, mendoj se ka një tendencë nga disa media, kryesisht ato që kanë një pozicion kundër emigrantëve që të marrin shpeshherë shqiptarët si një shembull i keq për të argumentuar që pse duhet të ulet numri i emigrantëve në Britaninë e Madhe”, mendon Hoxhaj i cili u emërua Oficer i Urdhrit Më të Shkëlqyer të Perandorisë Britanike (OBE) për shërbimet e tij në marrëdhëniet MB-Shqipëri.

Analizat e CMC-së janë publikuar në gazetën “The Telegraph” disa herë që nga dhjetori 2023, si dhe në “The Critic” dhe “Express” nga një herë brenda kësaj periudhe.

Sipas faqes së saj të internetit, grupi u krijua zyrtarisht në janar 2024, pa renditur personat e përfshirë.

Por, Qendra për Kontrollin e Migracionit njihet edhe në qarqe të tjera mediatike në Britani si gazetë e njohur për qëndrimin e saj të krahut të djathtë kundër emigracionit.

“Nëse të dhënat e cituara në atë artikull të The Telegraph bazoheshin me të vërtetë thjesht e vetëm në analizën e Qendrës për Kontrollin e Migracionit – një institut kërkimi me qëllimin e deklaruar ideologjik të ‘kontrollit dhe reduktimit dramatik të migrimit në Britani’ – atëherë ky duket të jetë raportim thellësisht mashtrues nga gazeta, tashmë e njohur për qëndrimin e saj të krahut të djathtë, kundër emigracionit”, deklaroi për AP-në kryereporteri i “Byline Times”, Josiah Mortimer.

Drejtori i CMC-së është Robert Bates, i cili mendohet të jetë ish-ekzekutivi kërkimor i grupit të fushatës Euroskeptike “Get Britain Out”, si dhe është studiues në “Fushatën për Tregti Demokratike”, një grup që ka një llogari në Twitter/X dhe për të cilat ekzistojnë shumë pak informacione të tjera të disponueshme.

Qendra për Kontrollin e Migracionit ka gjithashtu një grup në Facebook, i cili ka qenë aktiv që nga viti 2019.

Hulumtimet e “Byline Times” në historinë e grupit zbulojnë se është në fakt një riemërtim i Future for Leave, simotra më e vogël e “Leave Means Leave”, ish grupi i presionit pro-Brexit, i vendosur edhe një herë në Tufton St. kur Nigel Farage ishte nën kryetari i saj.

Sipas Mortimer, është e qartë se kjo është një fushë tematike e mbushur me statistika të shtrembëruara dhe raportime sensacionale.

“Flet shumë fakti që brenda lajmit është një koment në artikull ku thuhet se ‘Home Office duhet të jetë shumë më i rreptë ndaj kombësive që kanë më shumë gjasa të përfshihen në kriminalitet’. Nëse të gjithë janë të barabartë para ligjit, a nuk duhet që zyrtarët e policisë të punojnë në bazë të keqbërjes, në vend që të synojnë kombësi të veçanta?”, ravijëzon mendimin e tij për Albanian Post kryereporteri i “Byline Times”.

Nga ana tjetër, Hoxhaj pohon për AP-në se komuniteti shqiptar në Britani shpesh merret si “shembull negativ për të shtyrë narrativën kundër emigrantëve”.

“Nuk e besoj se në vetvete kanë qëllim që të denigrojnë komunitetin shqiptar, por shpesh i marrin si shembuj të këqij për të shtyrë narrativën kundër emigrantëve dhe politikat më të ashpra”, vijon ai.

Doktori i Filozofisë sjell në vëmendje drejt mbylljes se komuniteti shqiptar nuk ka pikërisht instrumente për të luftuar disa nga këto narrativa.

“Përtej kësaj, shpesh komuniteti shqiptar në Britani nuk ka aq shumë instrumente për të luftuar disa nga këto narrativa, dhe politikanët që t’i përdorin shqiptarët si një shembull të keq për të shtyrë agjendat e tyre politike kundër emigrimit, që pastaj një pjesë e mediave pranë tyre e kthejnë si pjesë të narrativës”, përmbyll analizën e tij Dr. Andi Hoxhaj.

Gjatë kohës së publikimit, artikulli i The Telegraph zuri mbulim të gjerë në gazetat dhe mediat shqiptare, duke ju bashkëngjitur në një farë mënyre fushatës “keqdashëse” që vijon prej kohësh të synojë komunitetin shqiptar në Britaninë e Madhe për arsye politike.

Si u synua me “keqdashje” komuniteti shqiptar në Britani nga gazetat e djathta