Shqipëria

Si ndryshoi paga për funksionarët kryesorë shtetërorë


Pas votimit të së enjtes në Kuvendin e Shqipërisë, paga e funksionarëve kryesorë shtetërorë do të rritet ndjeshëm duke iu referuar projektligjit për rritjen e rrogave.

Votimi i ligjit pritet të dekretohet edhe nga presidenti i Republikës për të hyrë zyrtarisht në fuqi.

Pikërisht, kreu i shtetit Bajram Begaj pritet të përfitojë i pari një rritje të konsiderueshme të pagës, nga 257 mijë lekë në 425 mijë lekë.

Kryeministri dhe kryetarja e Kuvendit do të regjistrojnë një rritje page nga 228 mijë lekë, në rreth 393 mijë lekë.

Ligji i ri parashikon një dyfishim të pagave për ministrat të cilët do të paguhen 318 mijë lekë nga 174 mijë që ishte deri tani.

Deputetët do të përfshihen gjithashtu mes përfituesve në rritjen e pagës duke marrë 310 mijë lekë nga 156 mijë që paguheshin deri në këto momente.

Ky projektligji mori aprovimin e 97 deputetëve ndërsa tre prej tyre votuan kundër.

Më herët, Komisioni i Ekonomisë votoi në unanimitet të rrisë edhe rrogat e deputetëve dhe ministrave.

Diskutimi që nisi para zgjedhjeve u bllokua në komision për shkak se deputetët kërkuan që të përfshiheshin edhe ata në skemën e rritjes së pagave.

Ministrja e Financave Delina Ibrahimaj ka thënë se rritja e pagave për deputetët dhe ministrat do të bëhej në një moment të dytë.

“Paga në administratën publike do të shkojë në 900 euro në dy hapa. Hapi i parë sapo ka filluar dhe hapi i dytë do të jetë gjatë vitit të ardhshëm. Me përcaktimin e pagës së Presidentit si paga më e lartë, janë të lidhura edhe disa funksione të krijuara në kuadër të reformës në drejtësi. Praktikisht përfitojnë”, ka thënë ajo.

Kurse për sa i përket koeficentëve të pagës për pozicionet që kanë të bëjnë me institucionet e Kuvendit dhe Ekzekutivit, ajo ka thënë se janë përshtatur pa ndryshuar nivelin aktual të pagave për ta rikonsideruar në një moment të dytë.

Kjo për shkak se qëllimi ishte fokusimi te finalizimi i kësaj politike të re të rritjes së pagave për një kategori më të madhe përfituesish sikundër janë të gjithë punonjësit e administratës publike qendrore dhe vendore.

“Ne donim që të gjithë kategoritë e tjera të përfitonin nga rritja e pagave dhe në përfundim të kësaj, do të sillnim një nisëm për rishikimin e koeficentëve për anëtarët e kabinetit dhe deputetët”, ka treguar ajo.

Sipas saj, qëllimi ka qenë që reforma të përfundonte dhe më pas të përcaktohej paga e ministrit dhe deputetit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore