Në mes të dokumenteve të paraqitura për identifikim në pikën kufitare një shtetas shqiptar kishte futur edhe një kartëmonedhë prej 50 eurosh.
Me këto para E.R., i lindur në vitin 1986 donte të blinte hyrjen në shtetin e Kosovës.
Zyrtari Policor i cili po bënte kontrollimin dhe regjistrimin në pikën kufitare Vërmicë, ka kërkuar të di nga vozitësi i veturës se përse këto para janë në dokumente.
Sipas raportit zyrtar nga Policia e Kosovës është raportuar se njëri nga 4 pasagjerët në po të njëjtën veturë, me targa të Shqipërisë i ka thënë se me këto para do që t’i lejohet hyrja në Kosovë.
“Këto të holla i ka vendosur pasi që kishte ndalesë për të hyrë në Republikën e Kosovës dhe me to t’i mundësohet hyrja”, thuhet në raportin e Policisë.
Gjatë kontrollit në sistemin e të dhënave të Policisë Kufitare është identifikuar se E.R, shtetas shqiptar e kishte të ndaluar të hynte në Republikën e Kosovës për pesë vite.
I dyshuari është shoqëruar në Stacionin Policor në Vërmicë, dhe më pas është njoftuar prokurori kujdestar.
Ky i fundit i ka hapur rast për kryerjen e veprës penale “Dhënie e ryshfetit personit zyrtar”.
Personi i dyshuar është intervistuar nga Policia në prezencë të avokatit mbrojtës dhe me pas me vendim të prokurorit është dërguar Qendrën e Mbajtjes në Prizren.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
