Në Itali është hapur një hetim, pas vandalizmit të një prej atraksioneve turistike më të vizituara në Sicili, shkëmbi gëlqeror Scala dei Turchi (Shkallët e Turqve).
Shkëmbi, i cili ka formën e një shkalle të madhe dhe përbëhet nga gurë gëlqerorë të bardhë e të butë, mbrëmjen e 7 janarit, u gjet i mbuluar me pluhur në ngjyrë të kuqe.
Nga hetimet paraprake u konstatua se mbi shkëmb mendohet që të jetë hedhur oksid hekuri i kuq.
Sipas presidentit të Sicilisë, Nello Musumeci, ky gjest përbën një zemërim jo vetëm për një pasuri me bukuri të rrallë, por edhe për imazhin e ishullit.
Pjesa e poshtme e shkëmbit është “larë” pjesërisht nga deti. Fatmirësisht është material, i cili hiqet mjaft lehtë. Një grup vullnetarësh kanë dalë për të pastruar pjesën e mbetur.
Kryeprokurori i Agrigento-s, Luigi Patronaggio, ka shpjeguar se tashmë ka nisur një hetim.
“Ne po gjurmojmë shitjet e fundit të pluhurit të kuq në zonë. Kjo mund të na çojë drejt blerësve”, ka thënë ai.
Shkëmbi – që del në Mesdhe nga brigjet e Realmonte në Sicilinë Jugore – ka pësuar erozion natyror. Shpeshherë ndodh që turistët të vjedhin pjesë prej tij.
Bazuar te disa dokumente që datojnë që nga shekulli i XIX-të, Ferdinando Sciabbara pretendon se është pronar i një pjese të vijës bregdetare.
Ai u hetua për pushtimin e tokës dhe krime të tjera që lidhen me ruajtjen e zonës.
Verën e kaluar, Sciabbara u urdhërua të paguante një gjobë prej 9 mijë euro.
Pas pagesës, toka iu kthye sërish atij.
Sipas raportimeve në shtypin italian, Sciabbarra është gati t’ua shesë pjesën e tij të tokës autoriteteve lokale, me kusht që të krijohet një rezervë natyrore.
Marrë nga “The Guardian”, përshtatur për Albanian Post!
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com