Një konflikt i armatosur midis oficerëve të policisë dhe protestuesve ka ndodhur në hyrjen e dhomës së Kongresit në SHBA.
Pamjet tregojnë një grup të efektivëve të policisë që kanë drejtuar armën drejt derës. Nga dera, duket qartë një dorë e cila mban një pistoletë.
Një ligjvënës amerikan, ka pohuar për CNN-in, se dhoma e Kongresit është evakuar menjëherë pas ngjarjes. “Ka pasur një konflikt me armë”, deklaroi ligjvënësi. “Policia i ka drejtuar armët dikujt që po përpiqej të shpërthente derën”.
Qindra protestues zaptuan ndërtesën e Capitol-it në SHBA, në çastin kur Senati dhe Kongresi po kryenin certifikimin e zgjedhjes së Joe Biden si presidenti i ri i SHBA-së.
Brenda ndërtesës, janë dëgjuar disa herë të shtëna armësh. Një grua ka mbetur e plagosur rëndë. Më vonë është raportuar se gruaja ka ndërruar jetë nga plagët e marra.
Puna e Senatit dhe Kongresit u ndërpre pas mësymjes së godinës.
Protestuesit filluan bastisjen e Capitol-it pas deklaratave të Trump se “republikanët nuk duhet të pranojnë vjedhjen e votave që ka ndodhur në zgjedhjet presidenciale amerikane”.
Kjo është hera e parë në 200 vite që Capitol-i “pushtohet” nga populli. Hera e fundit që ka pasur konflikt të armatosur brenda institucionit, ka qenë viti 1812.
Protestat në SHBA kanë shokuar gjithë opinionin publik mbarëbotëror./AlbanianPost.com
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
