Kamala Harris hyri në histori si gruaja e parë me ngjyrë dhe aziatika e parë që u bë Zëvendëspresidente e Shteteve të Bashkuara të Amerikës (SHBA).
Harris u betua si zëvendëspresidente nga gjykatësja e parë hispanike në historinë e Gjykatës së Lartë, Sonia Sotomayor.
Sotomayor u emërua në Gjykatën e Lartë nga ish-presidenti Barack Obama në vitin 2009. Njësoj si Harris, Sotomayor ka thyer barrierat gjatë gjithë karrierës së saj. Ajo është gjithashtu gjykatësja e tretë femër në historinë e Gjykatës së Lartë të SHBA-së.
Zëvendëspresidentja Harris u shoqërua nga Oficeri i Policisë së Capitol-it, Eugene Goodman. Goodman-i u cilësua si një hero pas shfaqjes së videos së tij duke zhvendosur turmën e dhunshme larg dhomës së Senatit gjatë bastisjes së Capitol-it.
Kamala Harris kishte zgjedhur ngjyrën vjollcë në veshjen e saj. Një ngjyrë mjaft domethënëse për të. Kur ajo kandidoi për presidente, në ngjyrat e fushatës së saj ishin vjollca dhe e verdha.
Ky është një nderim për Shirley Chisholm-in. Ajo garoi për president si gruaja e parë me ngjyrë dekada më parë dhe frymëzoi karrierën politike të Harris.
Zëvendëspresidentja publikoi tweet-in e saj të parë. Harris shkruan “Gati për të shërbyer”./AlbanianPost.com
Ready to serve.
— Vice President Kamala Harris (@VP) January 20, 2021
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com