Ish-eprori i Ushtrisë Çlirimtare të Kosovës (UÇK), Pjetër Shala, është dënuar për krime lufte nga trupi gjykues i Gjykatës Speciale me 18 vjet burgim.

Shala është shpallur fajtor për ndalim arbritrar, torturë dhe vrasje të paligjshme, derisa është liruara nga akuza për trajtim mizor.

Sipas aktgjykimit që është lexuar në Speciale, 18 persona u mbajtën të ndaluar në kushte çnjerëzore në fabrikën e metalit në Kukës të Shqipërisë, derisa njëri nga ta u vra.

Ndërkaq gjatë shqiptimit të dënimit, Shala dëgjohej duke bërtitur, ndërsa trupi gjykues i tërhiqte vërejtjen duke thënë se nuk dëgjohet dhe se nuk e ka radhën të flas.

Gjyqtarja që e ka lexuar aktgjykimin ka thënë se trupi gjykues ka dëgjuar disa dëshmitarë që janë ndaluar në këtë fabrikë dhe është bindur për ndikimin psikologjik që kanë pësuar nga këto ngjarje në jetët e tyre.

“Viktimat ishin shqiptarë të Kosovës, dëshmitë ishin të hollësishme dhe bindëse. Të ndaluarit u keqtrajtuan keq nga Shala dhe njëri nga ta u vra”, tha gjyqtarja.

“Po citoj një dëshmitar, se po të kishte ligje e shtet në Kosovë ish kryer atje, se nuk ka guxuar askush t’i marrë në dorë lëndët”, potencoi ajo.

“Të ndaluarit janë rrahur gjatë gjithë natës dhe u detyruan ta godisnin njëri-tjetrin me shuplaka dhe të shtirreshin sikur po kryenin marrëdhënie seksuale. Disa prej të ndaluarve u qëlluan edhe me armë”, shtoi.

Megjithatë, Shala i kishte mohuar të gjitha akuzat ndaj tij, duke thënë se asnjëherë nuk kishte luftuar kundër civilëve, por ndaj regjimit të Slobodan Millosheviçit.

“Asnjëherë në jetën time nuk e kam bërë atë që më ngarkohet. Unë kam qenë vetëm një luftëtar. Ne nuk kemi luftuar kundër civilëve”, pati theksuar Shala.

“Kam luftuar kundër një makinerie të regjimit të Millosheviçit, por kurrë kundër civilëve. Nëse është qëllimi i këtij institucioni të më dënoni pse kam luftuar për lirinë e popullit dhe vendit është në rregull”, thoshte Shala.

Deri më tani, Dhomat e Specializuara, që njihen edhe si Gjykata Speciale, kanë shqiptuar dënim për pengim të drejtësisë ndaj ish-krerëve të Organizatës së Veteranëve të Ushtrisë Çlirimtare të Kosovës, Nasim Haradinaj dhe Hysni Gucati, të cilët vitin e kaluar u liruan me kusht.

Aktualisht në është duke u zhvilluar një rast gjyqësor, ai ndaj ish-krerëve të UÇK-së – Hashim Thaçi, Kadri Veseli, Jakup Krasniqi dhe Rexhep Selimi – që akuzohen për krime lufte dhe krime kundër njerëzimit.

Ndryshe, në procesin gjyqësor që nisi më 3 prill 2023, katër ish-drejtuesit e UÇK-së u deklaruan të pafajshëm rreth akuzave për krime lufte.

Dhomat e Specializuara dhe Zyra e Prokurorit të Specializuar hetojnë krimet e pretenduara të pjesëtarëve të Ushtrisë Çlirimtare të Kosovës, të kryera kundër pakicave etnike dhe rivalëve politikë që nga janari i vitit 1998 deri në dhjetor të vitit 2000.

Shala dënohet për krime lufte nga Specialja me 18 vjet burgim