SBASHK-u pas ekzekutimit të pagave: Mund të diskutojmë për kompensimin e orëve

Ymer Ymeri, koordinatori për organizim të brendshëm në Sindikatën e Bashkuar të Arsimit Shkencës dhe Kulturës dhe njëherit nënkryetar i kësaj sindikate, ka konfirmuar për Albanian Post, se ka filluar ekzekutimi i pagave për mësimdhënësit të cilët ishin në grevë gjatë muajit shtator.

Edhe pse ekzekutimi i pagave deri më tani ka qenë i pjesshëm, Ymeri beson se për një kohë të shkurtër të gjithë mësimdhënësit grevistë do të pranojnë në llogaritë e tyre bankare pagën e muajit shtator.

“Ka filluar ekzekutimi, ende nuk janë ekzekutuar të gjitha, por mund të ju konfirmojë se ekzekutimi ka filluar”.

Për Ymerin ekzekutimi i pagave është një lajm i mirë dhe një gjë e tillë bënë që ata të shpresojnë se në ditët në vijim do të mund të diskutojnë të gjitha çështjet e ngritura nga ana e tyre me eksponentë të qeverisë.

“Është lajm i mirë kemi insistuar në vazhdimësi për ekzekutimin e pagave, jemi të gëzuar që janë ekzekutuar pagat edhe pse me 1 javë vonesë, megjithatë është një lajm i mirë”, ka shtuar ai.

Sipas Ymerit kërkesa e Ministrisë së Arsimit për të kompensuar orët e humbura si shkak i grevës, është një çështje e cila mund të diskutohet gjithmonë në kuadër të dialogut Sindikatë-Ekzekutiv.

“Do të bisedojmë për atë çështje, nëse Ministria e Arsimit është e interesuar për dialog ne jemi për të biseduar, primare për ne ishte ekzekutimi i pagave, pastaj për kompensimin e orëve do të bisedojmë ashtu siç shkruan në kontratën kolektive”, ka shtuar ai.

Megjithatë të njëjtën gjë nuk e thotë edhe ministri i Financave, Hekuran Murati.

Sipas tij tashmë zëvendësimi i orëve të humbura mësimore është një akt i kryer dhe për këtë nuk nevojitet aspak diskutim.

“Pas konfirmimit të listave nga komunat, Thesari sot ka ekzekutuar pagesën e paradhënies për orët e muajit shtator që do të zëvendësohen sipas kalendarit të ri mësimit, të miratuar nga MASHTI”, ka shkruar ai në rrjetin e tij social në Facebook.

Pas një maratone interpretimesh të ligjeve e akuzave të ndërsjella, Qeveria e Kosovës ka vendosur që të ekzekutojë pagat për mësimdhënësit grevistë.

Lajmin për ekzekutimin e pagave e ka bërë të ditur për Albanian Post, Drejtori i Asociacionit të Komunave të Kosovës, Sazan Ibrahimi.

“Po, janë ekzekutuar pagat për mësimdhënësit grevistë”, tha Ibrahimi për AP.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.