Kompanitë perëndimore vazhdojnë të paguajnë pothuajse 200 mijë punonjës me bazë në Rusi, pavarësisht premtimeve për të pezulluar ose për t’u dhënë fund aktiviteteve në vend, duke rritur frikën e shkarkimeve masive ose shtetëzimit, ndërsa shpresat zbehen për një fund të shpejtë të luftës në Ukrainë.
Një varg kompanish perëndimore, nga “McDonald’s” te “Renault”, u angazhuan për të dhënë pagat e mijëra punonjësve kur ndaluan operacionet në vend muajin e kaluar.
Analiza e “Financial Times”, përcjell Albanian Post, tregon se të paktën 188 mijë punonjës vazhdojnë të jenë në listat e pagave.
Numri i vërtetë ka të ngjarë të jetë shumë më i lartë, pasi punëdhënësit e mëdhenj, duke përfshirë pronarin e “KFC-së”, “Yum Brands” dhe “Coca-Cola”, nuk kanë konfirmuar nëse ata ende po paguajnë stafin.
Analiza vjen, ndërsa kryebashkiaku i Moskës, Sergei Sobyanin, paralajmëroi të hënën se në mesin e punëtorëve në kompanitë e huaja në kryeqytetin rus “rreth 200 mijë punonjës janë në rrezik të humbasin punën e tyre”, duke thënë se autoritetet kishin miratuar një plan mbështetjeje me vlerë 3.36 miliardë monedhë ruse Rbs (41.4 milionë dollarë) për ata në rrezik.
Ndërsa punëdhënësit me jakë të bardhë si “Boston Consulting Group”, “Linklaters” dhe “McKinsey” po transferojnë punëtorë në role në vende të ndryshme, punonjësit jakë blu në sektorët e prodhimit, shitjes me pakicë dhe konsumatorit rrezikojnë të mbajnë peshën kryesore të humbjeve të vendeve të punës nëse kompanitë nuk shohin perspektivë të afërt për rihapje.
Chip Bergh, shefi ekzekutiv i “Levi Strauss”, këtë muaj tha se marka e xhinseve ende po paguante mbi 800 punonjësit e saj në Rusi. Por ai shtoi se “siç po shkojnë gjërat tani, nuk jam optimist se do të kthehemi në biznes me fuqi të plotë në çdo kohë së shpejti”.
Kompanitë që kanë pezulluar operacionet janë ende të detyruara t’i paguajnë punonjësit sipas ligjit rus, tha Peter Finding, avokat punësimi në “FisherBroyles”.
Opsionet përfshinin pagesën normale të punonjësve, pagimin e pagave deri në gjashtë muaj në paketat e kombinuara të tepricës dhe pushimit nga puna, ose ridrejtimin e punonjësve në zona të biznesit që nuk preken nga pezullimet, tha ai.
Punëdhënësit gjithashtu mund të bien dakord të mbajnë stafin me paga të reduktuara, ndërsa operacionet janë pezulluar, shtoi ai, duke thënë se punonjësit do të kishin pak fuqi negociuese në këtë skenar.
Sipas një sondazhi nga “BCG”, shumica e investitorëve besojnë se do të duhen dy deri në pesë vjet përpara se kompanitë perëndimore të kthehen në Rusi.
Vazhdimi i pagesës së stafit me pagën minimale prej afërsisht 12 mijë e 500 Rbs (156 dollarë) në muaj është një shpenzim relativisht i vogël për kompanitë e mëdha.
Megjithatë, shumë kompani perëndimore po luftojnë për të transferuar para në ekonominë e goditur nga sanksionet dhe nuk janë në gjendje të gjenerojnë të ardhura, ndërkohë që operacionet janë pezulluar.
Qeveria ruse tashmë po përpiqet të shmangë papunësinë masive, duke nisur një paketë prej 40 miliardë dollarësh, me anë të së cilës kryeministri Mikhail Mishustin tha se do të mbështeste rreth 400 mijë punëtorë.
Megjithatë, pavarësisht fuqisë së opinionit publik perëndimor, “një pjesë e madhe e bizneseve mendojnë se do të ndodhë një kthim.
Ekziston gjithashtu pasiguri mbi ndikimin që mund të ketë humbja e vendeve të punës brenda Rusisë në opinionin politik ndaj luftës.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
