Rënia e “Messi-t maroken”, Mastour gjen ekip të ri

Hachim Mastour pak vite më parë konsiderohej si një nga talentet më të mëdhenj në futboll.

Marokeni u rrit në akademinë e Milan-it dhe shpejt mori vëmendjen e opinionit të futbollit botëror.

Kuqezinjtë e nënshkruan mesfushorin për 500 mijë euro nga Reggiana, kur ai ishte 14 vjeç.

Në atë kohë, Milan-i parakaloi skuadra, si: Juventus, Inter, Real Madrid dhe Manchester City në garën për “xhevahirin e ri të futbollit”.

Ai premtonte shumë.

U stërvit me ekipin e parë dhe kur ishte 15 vjeç ishte gati të debutonte.

Në sezonin 2013-’14, kur Milan-i drejtohej nga Clarence Seedorf, në një ndeshje kundër Sassuolo-s në “San Siro”, ai u thirr, por nuk mundi të merrte minuta.

Nga aty filloi rënia e Mastour.

Ai u huazua te Malaga dhe, më pas, te PEC Zwolle.

Në 2018 përfundoi kontratën me Milan-in dhe doli lojtar i lirë.

Po në atë vit, 2018, marokeni kaloi në ligën greke te skuadra e PAS Lamia-s.

Më pas luajti në nivelet e ulta në Itali me skuadrat e Carpi dhe Reggina-s.

Tashmë ka gjetur një sistemim të ri.

Në moshën 24-vjeçare, kur duhet të ishte në majën e futbollit evropian, Mastour është transferuar te Nahdat Zemamra. Skuadër e kategorisë së dytë në Marok.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.