Referendumi në Kansas, fitore për grupet në mbrojtje të së drejtës për abort

Shteti amerikan i Kansas-it ka vendosur në një referendum të mbrojë të drejtat e abortit.

Në masë dërrmuese, votuesit kanë thënë se nuk dëshironin të ndryshonin kushtetutën e shtetit në mohim të së drejtës së abortit.

Ky rezulton të jetë testi i parë për çështjen që kur Gjykata e Lartë e SHBA-ve lejoi shtetet të ndalonin procedurën.

Nëse votimi do të kishte shkuar në anën tjetër, ligjvënësit mund të kishin kufizuar ose ndaluar më tej abortin në Kansas.

Ky votim ishte pritur shumë që kur Gjykata e Lartë e SHBA-ve dy muaj më parë përmbysi vendimin e vitit 1973 që legalizonte abortin në mbarë vendin, “Roe vs Wade”.

Sakaq, parashikohet që banorët e Kansas-it të kenë votuar me më shumë se 60 për qind për të mbështetur të drejtën e grave për të kryer abort.

Pritet që rezultati zyrtar të konfirmohet brenda një jave.

Projeksionet mbi votimin po shihen si një shenjë se amerikanët janë thellësisht të pakënaqur me përmbysjen e të drejtave të abortit.

Zyrtarët e Kansas-it kanë treguar se pjesëmarrja e votuesve në të gjithë shtetin ishte dukshëm më e lartë se sa pritej në një ditë votimi paraprake.

Megjithëse Kansas-i është shumë konservator, rregullat e tij për abortin janë më pak strikte se shumë shtete të tjera të udhëhequra nga republikanët.

Vendi ka lejuar që shtatzënitë të ndërpriten deri në 22 javë me kufizime të tjera, duke përfshirë një periudhë të detyrueshme pritjeje 24-orëshe dhe pëlqimin e detyrueshëm të prindërve për fëmijët.

Kurse më shumë se një duzinë shtete të udhëhequra nga republikanët kanë lëvizur për të ndaluar ose kufizuar abortin që nga vendimi i Gjykatës së Lartë më 24 qershor.

Por në të gjithë SHBA-të, dhjetë shtete kanë të drejtën e abortit të sanksionuar në kushtetutat e shteteve të tyre, dispozita që mund të anulohen vetëm përmes referendumeve.

Marrë nga “BBC”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.