Reaktori më i madh bërthamor në Evropë fillon prodhimin

Reaktori i ri bërthamor Olkiluoto 3 (OL3) i Finlandës, më i madhi në Evropë, do të fillojë prodhimin e rregullt të dielën, duke rritur sigurinë energjetike në rajonin ku Rusia ndërpreu furnizimin me gaz dhe energji elektrike, njoftoi operatori i tij.

Lajmi u bë i ditur nga agjencia “Al Jazeera”.

Energjia bërthamore mbetet e diskutueshme në Evropë, kryesisht për shkak të shqetësimeve të sigurisë, dhe lajmet për lëshimin e OL3 vijnë pasi Gjermania filloi mbylljen e tre reaktorëve të saj të fundit të shtunën, ndërsa Suedia, Franca, Britania dhe të tjerët planifikojnë zhvillime të reja.

Teollisuuden Voima (TVO), operatori i OL3, i cili është në pronësi të kompanisë finlandeze Fortum dhe një konsorciumi të kompanive energjetike dhe industriale, tha se njësia pritet të plotësojë 14 për qind të kërkesës për energji elektrike të Finlandës, duke reduktuar nevojën për importe nga Suedia dhe Norvegjia.

Ndërtimi i reaktorit 1,6 gigavat-orë (GW), i pari termocentral i ri bërthamor në Finlandë në më shumë se katër dekada dhe i pari në Evropë në 16 vjet, filloi në vitin 2005.

Termocentrali fillimisht ishte menduar të vihej në funksion katër vjet më vonë, por u shfaqën një sërë problemesh teknike.

OL3 dorëzoi prodhimin provë në rrjetin kombëtar të energjisë të Finlandës në mars të vitit të kaluar dhe më pas pritej të fillonte prodhimin e rregullt katër muaj më vonë, por pësoi një sërë defektesh, të cilat u deshën muaj për t’u riparuar.

Si rezultat i kësaj lëvizjeje, analistët thonë se Finlanda, i vetmi vend nordik me një deficit të madh të energjisë elektrike, mund të presë kosto më të ulëta të energjisë elektrike.

Eksportet ruse të energjisë elektrike në Finlandë përfunduan në maj të vitit të kaluar, kur kompania ruse Inter RAO njoftoi se nuk ishte paguar për energjinë që shiste, pasojë e zgjerimit të hendekut midis Moskës dhe Evropës për pushtimin rus të Ukrainës.

Monopoli shtetëror rus i eksportit Gazprom përfundoi furnizimet me gaz natyror në Finlandë menjëherë pas kësaj.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.