Kryetari i komunës së Deçanit, Bashkim Ramosaj dhe anëtarët e zgjedhur të kuvendit të cilët dolën fitues në garën e zgjedhjeve lokale për këtë komunë me 14 tetor, të mërkurën janë betuar për realizimin e të gjitha projekteve që kanë premtuar në këtë komunë.
Ramosaj, i cili ka udhëhequr këtë komunë edhe gjatë katër viteve të fundit ka thënë se përpara e kanë edhe një mandat sfidues.
“Uroj që Deçani, pavarësisht sfidave, pavarësisht padrejtësive që i kanë ndodhur këtij qyteti mos me u ndal në ëndrrën e tij për një qytet që e meritojmë”.
“Do të jenë sfiduese prapë se prapë këto katër vite, ndoshta më sfiduese se katër vitet që i kemi lënë pas për shkak të stadit dhe të konceptit që Deçani duhet me dalë me një stad tjetër”, ka thënë Ramosaj.
Ai po ashtu ka falënderuar të gjithë qytetarët që e kanë mbështetur duke i besuar edhe një mandat në krye të kësaj komune.
“Unë do jem i gatshëm për këtë sfidë, kam qenë i gatshëm gjithmonë për këtë sfidë, me këtë qëllim edhe kam konkurru dhe dua t’i falënderoj të gjithë qytetarët e Deçanit për besimin e dhënë, sidomos dua të falënderoj të gjithë qytetarët e komunës së Deçanit për maturinë dhe përpjekjen që e kanë në politikë, pavarësisht cilit subjekt politik i takojnë”, ka thënë ai.
Bashkim Ramosaj ka dalë fitues në zgjedhjet e 17 tetorit më 65.87 për qind të votave.
Në fillim të kësaj mbledhje u mbajt një minutë heshtje për tre viktimat të cilët të premtën u vranë në Gllogjan.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com