Kryeministri Edi Rama ka reaguar ashpër ndaj Shoqatës së Gjyqtarëve, duke e akuzuar se po vepron si parti politike dhe jo si përfaqësuese e një pushteti që duhet të arbitrojë në mënyrë të paanshme.

Në një deklaratë publike, Rama tha se është e papranueshme që një shoqatë e gjyqtarëve të marrë rol politik, duke përdorur etiketime si “tymnajë populiste” dhe duke kërkuar rritje të konsiderueshme pagash përmes vendimeve gjyqësore.

“Ju nuk jeni parti politike. Nëse doni të bëni politikë, regjistrohuni si parti dhe merrni pjesë në fushata”, u shpreh ai.

Kryeministri theksoi se qëndrimi i Qeverisë nuk përbën fushatë kundër gjyqtarëve dhe se askush nuk është anatemuar me emër. Sipas tij, bëhet fjalë për një shqetësim publik, pasi Shoqata e Gjyqtarëve po kërkon rreth 37 milionë euro shtesë nga buxheti i shtetit, çështje për të cilën palët janë aktualisht në proces në Gjykatën Kushtetuese.

Rama renditi kërkesat për rritje pagash, duke përmendur se paga e gjyqtarëve të shkallës së parë kërkohet të shkojë në 5.300 euro, e atyre të Apelit në 5.500 euro dhe e gjyqtarëve të Gjykatës së Lartë në 5.800 euro.

Ai veçoi megjithatë prokurorët e SPAK, të cilët sipas tij nuk janë bashkuar me këtë nismë, por për të cilët është kërkuar rritje page deri në 9.500, euro nga rreth 6.500 euro që janë pagat aktualisht.

“Po kërkoni rritje prej 2.000-3.000 euro në muaj me një vendim gjykate. Ku jemi këtu?”, deklaroi Rama, duke shtuar se pagat aktuale të gjyqtarëve janë më të lartat në rajon dhe të krahasueshme me ato të Greqisë, një vend anëtar i Bashkimit Evropian.

Çfarë tha Shoqata e Gjyqtarëve?

Shoqata Kombëtare e Gjyqtarëve të Republikës së Shqipërisë ka reaguar me shqetësim ndaj asaj që e cilëson si një fushatë publike dhe mediatike spekulative, e nxitur nga Kryeministri Edi Rama, që sipas saj synon linçimin e gjyqtarëve dhe ushtrimin e presionit mbi Gjykatën Kushtetuese, në një moment kur kjo e fundit ndodhet në fazën përfundimtare të vendimmarrjes për një çështje kushtetuese.

Në reagim, Shoqata thekson se kjo fushatë populiste krijon keqinformim publik dhe përbën përpjekje për intimidim të gjyqtarëve, duke cenuar qetësinë dhe pavarësinë e procesit vendimmarrës. Sipas saj, i vetmi zë legjitim që duhet të dëgjohet në këtë fazë është ai i vendimit të Gjykatës Kushtetuese.

Shoqata rikujton se përplasja mes pushtetit gjyqësor dhe ekzekutivit lidhet me statusin financiar të magjistratëve dhe ndërhyrjet e përsëritura, që nga viti 2016, në ligjin për statusin e tyre.

Sipas shoqatës, që në miratimin e reformës në drejtësi, Kuvendi ka devijuar nga propozimet fillestare të ekspertëve vendas dhe ndërkombëtarë, duke miratuar ndryshime që kanë përkeqësuar statusin financiar të magjistratëve dhe kanë cenuar standardet kushtetuese.

Në reagim renditen disa raste që cilësohen si “keqbesim” nga ana e pushtetit ekzekutiv dhe legjislativ, përfshirë shtyrjen e efekteve financiare të ligjit, trajtimin e pabarabartë të magjistratëve gjatë procesit të vetingut, si dhe ndërhyrjet përmes akteve nënligjore dhe ligjore që, sipas Shoqatës, kanë ulur në mënyrë të fshehur pagën referuese të magjistratëve.

Shoqata thekson se ndërhyrje të tilla janë shfuqizuar më herët nga Gjykata Kushtetuese, e cila ka vendosur se statusi financiar i magjistratëve nuk mund të reduktohet dhe se neni 138 i Kushtetutës garanton paprekshmërinë e pagës dhe përfitimeve të tyre.

Megjithatë, sipas reagimit, tentativa të reja për të cenuar këtë status kanë vijuar edhe në vitin 2023, çështje që aktualisht është në shqyrtim nga Gjykata Kushtetuese.

Shoqata mohon kategorikisht se iniciativat e saj kanë si qëllim rritjen e pagave, duke e cilësuar këtë si një narrativë spekulative të përdorur për të kthyer një proces kushtetues në “gjyq popullor”.

Sipas deklaratës, thelbi i kësaj beteje është mbrojtja e Kushtetutës, pavarësisë së pushtetit gjyqësor dhe dinjitetit të magjistratëve.

Shoqata e Gjyqtarëve thekson se veprimet e saj nuk janë destabilizuese, por përkundrazi kontribuojnë në forcimin e shtetit të së drejtës, demokracisë dhe ndarjes së pushteteve, duke paralajmëruar se çdo përpjekje për ndërhyrje antikushtetuese do të vijojë të kundërshtohet përmes mjeteve ligjore dhe kushtetuese.

Rama vijon kritikat e ashpra ndaj Shoqatës së Gjyqtarëve, për kërkesat për rritje pagash