“Holandezët dinë të të ‘vrasin’ në mënyrë të butë”.
Kështu ka deklaruar kryeministri i Shqipërisë, Edi Rama, në një intervistë për mediumin “De Volkskrant”, përcjell Albanian Post.
Rama u shpreh se është ndjerë i bllokuar prej kohësh nga Holanda, si vend kandidat për anëtarësim në BE, por tani shikon mundësi të mëdha bashkëpunimi.
Gazeta shkruan se Rutte dhe Rama kanë fituar respektin maksimal për njëri-tjetrin dhe do të nisin një plan të përbashkët në muajt e ardhshëm për të promovuar idenë e presidentit, Emmanuel Macron, për një ‘komunitet politik’.
“Ishte Rutte, ai që e sugjeroi. Për herë të parë, një anëtar i BE-së dhe një jo-anëtar i BE-së do të punojnë së bashku për të ardhmen e Evropës. Kjo bashkon dy ekstreme. Na u desh të kalonim nëpër të gjitha unazat e ferrit për të arritur në zemrën e këtij vendi dhe të Mark Rutte-s”, tha numri një i Qeverisë.
Kryeministri ka ravijëzuar se Holanda po ndërmerr hapa përpara dhe kjo është fantastike.
Sipas Ramës, kjo ishte një rrugë e vështirë, por ky qëndrim “na ka ndihmuar të hakmerremi duke vrapuar edhe më shpejt”.
Ai, në një retrospektivë, thotë se përgjigja negative nga Holanda po vijonte përgjithmonë, kështu që ishte koha për ndryshim.
“Kur Komisioni Evropian dha dy herë sugjerime pozitive, pas së cilës ato këshilla përfunduan në mulli të interesave kombëtare në Këshill, ishte shumë zhgënjyese. Tani marrëdhëniet tona me Holandën janë të shkëlqyera. Respekti që marrim tani ishte i paimagjinueshëm për ne disa vite më parë. Në atë periudhë u ndjemë vërtet të shtrydhur dhe të padëshiruar”.
Edhe një herë, kryeministri ka theksuar se është një mbështetës i idesë së Macron-it.
I pyetur se çfarë duhet të bëjë BE-ja me Serbinë, anëtare kandidate, e cila sapo ka nënshkruar një kontratë nafte me Rusinë, Rama thotë se “të kini shumë kujdes dhe mos pyesni verbërisht se çfarë nuk mund të japë Serbia”.
“Serbia nuk mund të heqë qafe shpejt varësinë e saj kryesisht nga gazi rus, por votoi kundër pushtimit të Rusisë tri herë në Kombet e Bashkuara. Kjo është unike dhe e re, askush nuk e priste këtë. Por Ballkani mbetet një zinxhir i pambrojtur. Lufta në Ukrainë mund të prishë lehtësisht stabilitetin – dhe madje të çojë në konflikt të hapur”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
