Rama nga WPC: Reformat globale jo thjesht hegjemonike, por harmonike

Kryeministri i Shqipërisë, Edi Rama, pjesëmarrës në Konferencën e Politikave Botërore në Abu Dhabi, gjeti rastin të fliste mbi politikat globale, të cilat sipas tij duhet të jenë multilaterale, por jo thjesht hegjemonike, sa harmonike.

Sipas Ramës, globalizmi është i ngjizur për të qëndruar në këtë botë.

“Për sa kohë jetojmë në të njëjtin planet e na ngroh i njëjti diell, duhet të qasemi për nga interesat tona të përbashkëta”, tha kreu i Qeverisë shqiptare.

Përtej faktit se disa shtete refuzojnë të bashkëpunojnë, ai thotë se problemet e përbashkëta i lidhin popujt me njëri-tjetrin.

Pika kryesore për Ramën, ishin ndryshimet klimatike, shuarja e konflikteve në botë dhe çështjet e sigurisë.

Për të parat, ai theksoi se Shqipëria është një ndër vendet që po merr masa. Një agjendë e njehsuar e atë të Evropës për vitin 2030, është gati nga Shqipëria. Këtu përfshihen edhe energjitë e rinovueshme si burim alternativ i elektricitetit. Ndër to, ajo e erës dhe diellit.

Mbi konfliktet, Rama përmendi rastin e Emirateve të Bashkuar Arabe, të cilat sipas tij, kanë qenë shembull suksesi i dialogut.

“Emiratet janë një model për multilateralizmin dhe paqen. Akordet e Abrahamit e tregojnë qartësisht këtë gjë, ku nuk u harrua e shkuara, por u pa për nga e ardhmja”.

Çështje me rëndësi e shtruar nga ai, ishin edhe problemet e “cyber” sigurisë në botë, ku për të, të gjithë shtetet të avancojnë dhe të mos mbesin mbrapa.

Kjo për Ramën, është një kohë sfidash globale dhe adaptimi sa më i shpejtë i këtyre strukturave, është domosdoshmëri.

Vendi i vogël për ndryshimet e mëdha

Përmendja e sfidave personale të Shqipërisë, nuk mungoi në fjalimin e kryeministrit përpara krerëve të tjerë botërorë.

Ai cilësoi kryesimin e OSBE-së nga Shqipëria si një periudhë e suksesshme ku u nënshkruan shumë marrëveshje pikërisht mbi këto çështje që shqetësojnë gjithë njerëzimin.

Lufta ndaj krimit të organizuar dhe korrupsionit, ka qenë ndër objektet kryesore të bisedës.

Shqipëria gjithashtu do të jetë për herë të parë pjesë e Këshillit të Sigurisë pranë Organizatës së Kombeve të Bashkuara, gjatë mandatit të përkohshëm 2022-2023.

“Ky besim i OKB-së, do të sjellë një perspektivë tjetër në Këshill”, tha Rama. “Perspektivën e një vendi të vogël ndaj multilateralizmit”.

Gjeste si ai shqiptar në strehimin e afganëve, nuk u anashkaluan në fjalimin kryeministror.

Ndërsa mesazhi përfundimtar, ishte një, i vetëm dhe i qartë: Bota duhet të shohë përpara.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.