Qytetarët e katër rajoneve ukrainase u bënë qytetarë rusë përgjithnjë, thotë Putin

“Rusë përgjithmonë”

Presidenti i Federatës Ruse, Vladimir Putin, deklaroi se qytetarët e Kherson-it, Zaporozhzhia-s, Donetsk-ut dhe Luhansk-ut u bënë qytetarë rusë përgjithmonë.

Lajmi u bë i ditur gjatë ceremonisë së nënshkrimit të aneksimit të katër rajoneve ukrainase.

Putin thotë se njerëzit në Ukrainën juglindore tani do të jetojnë në “atdheun e tyre të vërtetë historik”.

“Dua që qeveria e Kiev-it dhe shefat e saj të vërtetë në Perëndim të më dëgjojnë… Banorët e Donetsk-ut, Luhansk-ut, Zaporizhzhia-s dhe Kherson-it po bëhen qytetarët tanë përgjithmonë”, theksoi presidenti rus.

Putin i bëri thirrje Kiev-it zyrtar që të respektojë vullnetin e shprehur përmes referendumeve të këtyre rajoneve.

“Populli është shprehur, formimi i katër rajoneve të reja, subjekte të Federates Ruse, do të bëhet me ligj Kushtetues pasi është vullneti i miliona njerëzve”, u shpreh fillimisht kreu i Kremlin-it.

Sipas Putin-it, kjo është e drejta e tyre, e përshkruar në nenin 1 të kartës së OKB-së ku flitet për të drejtën e vetëvendosjes së popujve.

Ai thotë se Ukraina juglindore është në fakt pjesë e Rusisë, sepse paraardhësit e shtetit rus e sunduan atë, ishte pjesë e perandorisë ruse dhe sepse Bashkimi Sovjetik luftoi për ta çliruar atë nga nazistët në Luftën e Dytë Botërore.

“Ne do ta mbrojmë tokën tonë me të gjitha mjetet në dispozicion”, vazhdoi ai duke kërkuar më pas një minutë heshtje për nder të të rënëve në frontin ukrainas prej vitit 2014, të përcaktuar si “heronj të vdekur për Rusinë e Madhe”.

Kievi të ndalojë sulmet, ne jemi gati të negociojmë

Putin i bëri thirrje më pas Ukrainës që të ndalojë luftimet dhe të negociojë përfundimin e luftës me Rusinë.

“Ne do të mbrojmë tokat tona me të gjitha mjetet që kemi në dispozicion dhe do të bëjmë gjithçka për të mbrojtur popullin tonë. Ky është misioni ynë i madh çlirimtar”, garantoi kreu i Kremlin-it.

“Rusia nuk dëshiron dhe nuk ka nevojë për kthim nga BRSS, nuk ka kthim në të kaluarën”, shtoi Putin. “Kievi të respektojë vullnetin e popullit, të ndalë zjarrin dhe të kthehet në tryezën e bisedimeve, ne jemi gati”.

“Perëndimi është i obsesionuar nga ne”

Për të, Perëndimi po kërkon mënyra të reja për të goditur, për të dobësuar dhe për të shkatërruar Rusinë.

“Pas rënies së Bashkimit Sovjetik, Perëndimi vendosi që bota duhet të ndjekë diktatet e saj. Rusia rrezikoi të dorëzohej, por është rikuperuar dhe ka rifituar vendin e saj në botë dhe vazhdon të përpiqet t’i rezistojë atyre që duan ta dobësojnë atë”.

“Ata thjesht nuk mund të durojnë që të ketë një vend kaq të madh me territorin e tij, burimet e pasura natyrore dhe njerëzit që fitojnë”, nënvizoi ai.

Putin thotë se Perëndimi dëshiron ta bëjë Rusinë një “koloni”, “të grabisë” atë dhe t’i kthejë njerëzit e saj në një “turmë skllevërsh pa zë”.

“Ata nuk kanë nevojë për Rusinë, por ne kemi. Rusia do të jetë gjithmonë Rusi. Ne gjithmonë do të mbrojmë veten dhe atdheun tonë”, ishte mesazhi i radhës i presidentit rus.

Hegjemonia e Perëndimit ka marrë fund përgjithnjë

Putin u ndal edhe te “rendi i bazuar në rregulla” në Perëndim. “A i ka parë dikush këto rregulla? Kush ra dakord me to?”, pyet presidenti rus.

“Perëndimi mbështetet në mosndëshkimin, në faktin se gjithçka lejohet. Marrëveshjet ndërkombëtare, si Start, gjithashtu janë hedhur në erë me justifikime. Rusia nuk ka ndërmend të jetojë sipas të gjitha këtyre rregullave të rreme”, vazhdoi ai.

Kreu i Kremlin-it thotë se elita perëndimore është “koloniale” dhe “raciste” sepse ata “po përhapin rusofobinë në të gjithë botën”.

“Perëndimi ka thënë ndër shekuj se po sjell lirinë dhe demokracinë në botë. Gjithçka është pikërisht e kundërta”, thotë Putin.

Sipas Putinit, ai i Perëndimit “është një mashtrim, një mashtrim i vërtetë”. “Premtimet e NATO-s për moszgjerim ishin gënjeshtra. Me këto rregulla të rreme Rusia nuk ka ndërmend të jetojë”.

Dhe në fund fjalia përfundimtare: “Fundi i hegjemonisë perëndimore është i pakthyeshëm”.

Arma bërthamore dhe Nord Stream-i

Lidhur me mundësinë e përdorimit të armës bërthamore, presidenti rus kujtoi se “ishin SHBA që e hodhën atë, dy herë, në Japoni. Ai solli shembujt e Hiroshima-s dhe Nagasaki-t, bombardimet aleate të qyteteve gjermane, luftërat e Koresë dhe të Vietnamit.

Dhe pastaj një përmendje e rrjedhjeve që goditën gazsjellësin Nord Stream: “Të gjithë e kanë të qartë se kujt është sabotimi më i mirë, anglo-saksonët qëndrojnë pas shpërthimeve”.

«Anglosaksonët nuk ishin të kënaqur me sanksionet. Ata kaluan në sabotim dhe organizuan shpërthime kundër tubacioneve të gazit Nord Stream që kalojnë përgjatë fundit të Detit Baltik. Kështu ata në fakt filluan të shkatërrojnë infrastrukturën energjetike pan-evropiane”.

“E vërteta është në anën tonë. Rusia është me ne!”, ishte mesazhi i fundit i Putin-it në podium.

Çështja gjinore

Udhëheqësi i Kremlinit shkoi më tej, me një shembull rrëqethës të “dekadencës së Perëndimit”.

“A duam që prindi 1 dhe prindi 2 të jenë në Rusi në vend të mamit dhe babit? A jemi krejtësisht të çmendur? A duam që fëmijët tanë të indoktrinohen se ka gjini të tjera përveç meshkujve dhe femrave?”

Dekretet

Pas fjalimit, Putin nënshkroi “marrëveshjen për anëtarësimin në Rusi” të territoreve të pushtuara ukrainase të rajoneve Donetsk, Luhansk, Kherson dhe Zaporizhzhia.

Ai e lidhi të ashtuquajturin “aderim” me Federatën Ruse të territoreve të pushtuara, të cilën ai e barazon me “Novorossiya”, me “referendume” fiktive të mbajtura në fakt nën grykën e mitralozëve ushtarakë rusë.

Krerët e “supozuar” të rajoneve mbërritën në Kremlin për të “nënshkruar dokumentet”: nga Donetsk – Denys Pushylin, nga Luhansk – Leonid Pasichnyk, nga rajoni Zaporizhzhia – Yevhen Balytskyi, nga rajoni Kherson – Volodymyr Saldo.

Situata

Më herët, kreu i Kremlin-it nënshkroi dekretin për njohjen e Kherson-it dhe Zaporizhzhia-s si shtete të pavarura.

Ky dekret ishte hapi i fundit përpara aneksimit nga Rusia të katër rajoneve në Ukrainën lindore.

Nënshkrimi i 30 shtatorit është pjesë e procedurës përpara se ato të inkorporohen në Rusi, së bashku me Donetsk-un dhe Luhansk-un, të cilat tashmë janë njohur si shtete të pavarura.

Kjo i lejon Rusisë të pretendojë se po bashkon entitete të pavarura dhe jo pjesë të territorit ukrainas.

Zyrtarët e instaluar nga Rusia në katër rajone të okupuara të Ukrainës raportuan një shumicë të madhe votash në favor të bashkimit me Rusinë.

Votimet e organizuara me nxitim u zhvilluan gjatë pesë ditëve në rajonet lindore të Donetsk-ut dhe Luhansk-ut, dhe në Zaporizhzhia dhe Kherson në jug.

Katër rajonet së bashku përbëjnë rreth 15 për qind të territorit ukrainas.

Numri i votave nga rezultatet e plota të martën në katër provincat varionte nga 87% në 99.2% në favor të bashkimit me Rusinë.

Referendumi për aneksimin, çfarë do të ndodhë në katër rajonet ukrainase

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com