“Që nga nesër s’do jem më Kryeministër” – deklarohet Zdravko Krivokapiç

Kryeministri i Malit të Zi, Zdravko Krivokapiç, pas dështimit të votimit për shkarkimin e zv/kryeministrit të Malit të Zi, Dritan Abazoviç, në konferencë për media tha se “e di që s’do të jem më kryeministër”.

“E di që që nga nesër s’do të jem më kryeministër, sepse Gjukanoviç ka rënë në dakord me një pjesë të koalicionit, koalicion ky në të cilën është shprehur vullneti i popullit”, tha Krivokapiç.

“Tashmë është e qartë”, tha kryeministri, “sepse maskat kanë rënë”.

“Kush dëshiron të sheh, mund ta sheh, kush nuk dëshiron, mund të zgjedh të mos sheh. Unë në zemër jam ende profesor universiteti. Në politikë jam futur për shkak të Aktit të Lirive Fetare, dhe për atë e kam përmbushur synimin tim të vetëm politik. Sot, jam krejt i pastër para juve, i dashur popull i Malit të Zi”, tha Zdeavko Krivokapiç.

Sipas tij, drejtësia nuk u ka ardhur të gjithëve dhe për këtë duhet pyetur Dritan Abazoviçin, i cili është shefi i sigurimit nën udhëheqjen e të cilit janë MPB-ja dhe policia.

“Kjo është skuadra që u përpoq të pengonte kurorëzimin e Mitropolitit Joannicius. Ky është ekipi që duhet të na bindë se Mali i Zi është me të drejtë importuesi më i madh i bananeve dhe të njëjtën gjë bëri edhe regjimi i Milo Gjukanoviqit”.

Siç ka thënë ai, propozimi i tij për largimin e Abazoviçit ka mundur të ketë mbërritur më herët, por ka dashur t’i “zbulojë deri në fund qëllimet e tij”.

“E gjithë kjo ishte planifikuar shumë kohë më parë dhe ne po hyjmë në fund të një plani, aktorët e të cilit kanë punuar shumë më tepër fshehurazi sesa publikisht, shumë më tepër në dëm sesa në dobi të popullit. Ju e dini gjithashtu që nuk kam bërë asgjë fshehurazi, asnjë takim. Por ka një mësim të madh: “tregu i poshtër përfundoi në errësirë”. Ju mund ta quani atë pakicë të ndyrë tregu, Rogam, Beograd, qeveri banane – është një mashtrim”, tha Krivokapiç.

Ai u detyrua, siç shprehet ai, të udhëhiqej nga durimi sepse, ndër të tjera, këtë ia premtoi “birit më të madh të këtij populli, Amfilohijes”.

“Për mua ishin të pritshme të gjitha armiqësitë ndaj Qeverisë, nuk kisha frikë nga sinkronizimi i sulmeve, duke vepruar nga jashtë. Nuk u çudita kur mediat gjithmonë kundërshtare u mblodhën në platformën e shembjes, kur ishim të sulmuar nga të majtët dhe djathtët ekstremë”, tha mes tjerash ai.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.