Prokuroria Speciale zgjeron hetimin ndaj serbit që dyshohet se ishte pjesëmarrës në masakrën e Dubravës

Prokuroria Speciale e Kosovës ka njoftuar se të premten e 2 dhjetorit, ndaj të pandehurit me inicialet G.M., janë zgjeruar hetimet pasi dyshohet se i njëjti ka keqtrajtuar fizikisht të burgosurit në Burgun e Dubravës si dhe ka marrë pjesë në vrasjen e tyre.

“Prokuroria Speciale njofton se në kuadër të hetimit për vrasjet dhe keqtrajtimet e të burgosurve në Burgun e Dubravës, gjatë luftës në Kosovë, ka nxjerrë aktvendim për zgjerimin e hetimit kundër të pandehurit G.M., për shkak të dyshimit të arsyeshëm se ka keqtrajtuar fizikisht të burgosurit e atij burgu si dhe ka marrë pjesë në vrasjen e një numri të madh të të burgosurve gjatë muajit maj të vitit 1999”, thuhet në komunikatën për media.

Pas kërkesës së Prokurorisë Speciale, gjyqtari i procedurës paraprake i Departamentit Special të Gjykatës Themelore në Prishtinë, i ka caktuar të pandehurit G.M., paraburgim në kohëzgjatje prej një muaji.

Ndryshe, Policia e Kosovës ka njoftuar se ka arrestuar një serb, i dyshuar për krime lufte kundër popullsisë civile.

Në periudhën ndërmjet 19 e 24 majit të vitit 1999, rreth 1 mijë të burgosur shqiptarë në burgun e Dubravës, janë masakruar nga forcat serbe.

Në burgun e sigurisë së lartë, për 5 ditë rresht janë vrarë mizorisht rreth 160 persona.

Ndërsa 300 të tjerë kanë mbetur të plagosur.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.