Politikat e talebanëve rrezikojnë de facto ndalimin e universitetit për gratë afgane, thonë zyrtarët

Talebanët kanë vendosur që të ndalojnë vajzat të studiojnë në shkollat ​​e mesme. Kështu, de fakto ato nuk do të mund të marrin as diplomë universitare, ka thënë një zëdhënës i talebanëve dhe zyrtarë të universitetit.

Vajzat nuk do të kenë dokumentet e nevojshme për t’u regjistruar në arsimin e lartë, apo kapacitetin akademik për të filluar kurset universitare pas gati një viti jashtë shkollës.

“Automatikisht nëse nuk kemi maturante, nuk do të kemi më studente të reja”, tha Maulawi Ahmed Taqi, një zëdhënës i ministrisë së Arsimit të lartë të talebanëve.

“Unë shpresoj se ministria e Arsimit do të dalë me një politikë dhe së shpejti do të rihapë shkollat. Sepse e kemi kuptuar që është e rëndësishme dhe ndalimi i shkollimit të vajzave është i përkohshëm”.

Edhe nëse pengesat praktike për gratë që hyjnë në arsimin e lartë hiqen në muajt e ardhshëm, autoritetet po konsiderojnë gjithashtu t’i kufizojnë ato në diploma në kujdesin shëndetësor dhe arsim, tha një burim me lidhje me lidershipin taleban.

Pa një certifikatë diplomimi të shkollës së mesme, studentët afganë nuk mund të marrin provimin pranues në universitetin kombëtar, i cili kërkohet për t’u regjistruar edhe në kolegjet private.

Vitin e kaluar, talebanët automatikisht “diplomuan” vajza të klasës së dymbëdhjetë, duke i bërë ato të pranueshme për provim.

Në grupin në rritje të studentëve të mundshëm universitarë, gratë tashmë janë në disavantazh duke konkurruar me burrat që janë lejuar të mbarojnë shkollën. Në javët e fundit të vitit 2022, kur përfundon viti shkollor afgan, një klasë tjetër djemsh do t’i nënshtrohen provimeve përfundimtare të klasës së 12-të.

Nuk është e qartë nëse talebanët do të lëshojnë edhe një herë “certifikata të diplomimit të shkollës së mesme” të pakuptimta për vajzat që duhet të mbarojnë me to. Ligji afgan i ndalon ata të marrin provimin pranues pa një të tillë.

Edhe nëse lejohen të marrin pjesë, zyrtarët e universitetit që merren me pranimet thonë se janë të shqetësuar se sa do të mbeten prapa vajzat, pas gati një viti të ndaluar nga arsimi.

Marrë nga The Guardian, përshtatur për Albanian Post

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.