Përfundon protesta e serbëve – njoftojnë daljen nga institucionet

E qetë, ashtu siç ka nisur, ka përfunduar protesta e organizuar nga komuniteti serb në Mitrovicë të Veriut e në Graçanicë.

Protestuesit ishin më mijëra dhe kanë mbajtur pankarta kundër kryeministrit Albin Kurti, në duar, por në asnjë moment nuk ka pasur eskalim.

Numri i policëve në anën tjetër ishte shumë i vogël dhe kanë pasur vetëm rol monitorues.

Nga kjo protestë është kuptuar se zyrtarët serbë dhe politikanët serbë më nuk do jenë pjesë e institucioneve, derisa të kthehet prapa vendimi për suspendimin e gjykatëses serbe, Liljana Stefanoviç.

Kështu ka thënë, lideri i Listës Serbe, Goran Rakiç, kur ka mbajtur fjalën para protestuesve në Mitrovicë të Veriut.

“Derisa nuk kthehet në punë Liljana Stefanoviç, as ne nuk do të shkojmë në punë. Ne suspendojmë punën tonë në institucione derisa Stefanoviç kthehet në punë”, deklaroi Rakiç.

Rakiç, duke u folur mediave e protestuesve, ka pasur një mesazh edhe për kryeministrin, Albin Kurti.

“I dërgoj një mesazh Albin Kurtit dhe Policisë së Kosovës: nuk do të na frikësoni. Nuk kërkojmë asgjë më shumë sesa që kanë shqiptarët në Kosovë”.

Sipas Rakiç, vendimi për t’u larguar nga institucionet nuk erdhi dhe madje as nuk u përkrah nga presidenti serb, Aleksandër Vuçiç.

“Dua të theksoj se për herë të parë nuk kemi arritur një marrëveshje me presidentin Vuçiç për t’u larguar nga institucionet e Kosovës. Edhe sot i kemi kërkuar të njëjtën gjë, por ai ka kërkuar që mos ta bëjmë. Dua ta ritheksoj theksojë se të gjithë serbët që punojnë në institucionet e Kosovës duke përfshirë policinë do të pezullojnë punën deri në kthimin e Liljana Stevanoviç”.

Kryetarja e Gjykatës Themelore në Mitrovicë, Ljiljana Stevanoviç, u suspendua këtë të enjte, një ditë pasi Këshilli Gjyqësor i Kosovës njoftoi se ajo kishte marrë pjesë në takimin e së martës me presidentin serb, Aleksandër Vuçiç, në Beograd, kur u mblodh Këshilli i Sigurisë së Serbisë, për të diskutuar rreth zgjedhjeve serbe në Kosovë.

Këshilli Gjyqësor i Kosovës ka mbajtur këtë të enjte seancën e udhëhequr nga Kryesues i KGJK-së, Albert Zogaj.

Në deklaratën e KGJK-së u tha se në seancë, ndër të tjera, janë diskutuar edhe dy pika të mbyllura.

Pa dhënë detaje të tjera, KGJK njoftoi se është vendosur që të suspendohet kryetarja e Gjykatës Themelore në Mitrovicë deri në vendimin e ardhshëm.

“Këshilli ka vazhduar mbledhjen me dy (2) pika të mbyllura për: shqyrtimin e njoftimit të AGJ-së. nr. 93/2022 Kryetaren e Gjykatës Themelore në Mitrovicë dhe formimi i Dhomës Hetimore për Rastin Disiplinor nr. pas Krishtit. “KJK/07/2022/GJTHPR-AD/GJTHPR.nr.12/2022, me ç’rast ka vendosur që ta suspendojë kryetaren e Gjykatës Themelore në Mitrovicë, L.S., deri në vendimin e radhës”, thuhet në njoftim.

Në takim me Vuçiç, përveç politikanëve të Listës Serbe, morën pjesë edhe gjyqtarë dhe policë serbë të Komandës së Policisë së Kosovës dhe Zinxhiri Operativ.

Si rrodhën gjërat

Serbia ka zgjedhje më 3 prill. Këto zgjedhje, përmes OSBE-së, dëshironte t’i mbante edhe në territorin e Kosovës.

Qeveria e Kosovës nuk ka pranuar që të mbahen zgjedhje serbe në Kosovë, përveç nëse Qeveria e Serbisë i dërgon kërkesë zyrtare Qeverisë së Kosovës.

Qeveria e Serbisë nuk ka pranuar ta bëjë këtë, por ka pranuar propozimin e shteteve të QUINT-it, që Zyra Ndërlidhëse e Serbisë në Kosovë të komunikojë me Zyrën Ndërlidhëse të Kosovës në Beograd.

Qeveria e Kosovës nuk e ka pranuar këtë version, duke këmbëngulur në idenë e tyre, se duhet një komunikim mes qeverish, përndryshe nënkupton shkelje të sovranitetit dhe integriteti territorial të Kosovës.

Pasi u kuptua qëndrimi i Qeverisë së Kosovës, Aleksandër Vuçiç, ftoi urgjent Këshillin e Sigurisë Kombëtare.

Në mbledhje të këtij organi morën pjesë politikanë të Listës Serbe dhe zyrtarë serbë që punojnë brenda institucioneve të Kosovës.

Ata, siç u njoftua, kishin kërkuar nga Vuçiç që të largohen krejtësisht nga institucionet e Kosovës, si përgjigje për refuzimin e qeverisë kosovare që t’i lejojë të mbajnë zgjedhje në formën që ata donin.

Vuçiç u deklarua se ishte ai që i ndali nga kjo “ide radikale”.

Krejt në fund, dolën shtetet e QUINT-it me një deklaratë të përbashkët, ku lavdëronin Serbinë për qasje konstruktive dhe kritikonin Kosovën, duke i thënë edhe se po minonte rrugën e vet drejt integrimit euro-atlantik.

Pas kësaj, si kritikë për pjesëmarrje në Këshillin e Sigurisë së Serbisë, institucionet e Kosovës kanë shkarkuar gjyqtaren serbe, që ka punuar si kryetare e Gjykatës Themelore në Mitrovicë, Ljiljana Stevanoviç.

Për këtë arsye, Vuçiç del me deklarim se Marrëveshja e Brukselit, që rregullonte shuarjen e strukturave paralele dhe inkuadrimin e zyrtarëve serbë në institucionet e Kosovës, më nuk është e vlefshme.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.