“Pasaportat e arta’, Qipro heq shtetësinë e 45 personave që rezultuan të korruptuar

Autoritet në Qipro kanë filluar procedurat për të hequr shtetësinë e dhënë për 39 shtetas të huaj dhe gjashtë prej anëtarëve të familjes së tyre në kuadër të një programi – të shfuqizuar tashmë – të investimeve, për pajisjen e tyre me pasaporta vendase.

Një deklaratë e qeverisë tha se Këshilli i Ministrave vendosi të rrëzojë një vendim të mëparshëm për dhënien e shtetësisë një investitori të huaj dhe një “anëtari të varur të familjes”.

Asnjë informacion shtesë nuk u dha për identitetet e atyre që do të humbnin shtetësinë. Këshilli do të hetojë gjashtë raste shtesë dhe po monitoron 47 raste të tjera.

Qeveria shtoi se Komisioni Evropian do të njoftohej së shpejti për vendimin. Bashkimi Evropian e ka kritikuar vendin ishullor të Mesdheut lindor me programin, i cili filloi në vitin 2008, por u shtua në vitin 2013, pas një krize financiare.

Skema gjeneroi më shumë se 8 miliardë euro dhe u tregua veçanërisht tërheqëse për investitorët e huaj sepse marrja e një pasaporte të BE-së u lejoi atyre qasje në bllokun prej 27 anëtarësh.

Vendimi për heqjen e shtetësisë vjen me rekomandimin e një komisioni të pavarur, i cili hetoi programin pasi ai u hoq vitin e kaluar.

Kjo pasoi një raport të fshehtë televiziv i cili tregoi kryetarin e parlamentit dhe një ligjvënës të fuqishëm që pohonin se ata mund të shkelin rregullat për dhënien e shtetësisë.

Ata i kishin premtuar pasaportë kundrejt shpërblimit një reporteri që paraqitej si përfaqësues i një investitori fiktiv kinez i cili ishte dënuar për mashtrim në vendin e tij. Të dy dhanë dorëheqjen menjëherë pas transmetimit të raportit.

Në përfundimet e raportit në fillim të këtij viti, komisioni zbuloi se qeveria e Qipros vazhdoi të lëshonte në mënyrë të paligjshme pasaporta për të afërmit e investitorëve të pasur për të paktën katër vjet në kuadër të programit, pavarësisht dy paralajmërimeve të veçanta nga Prokurori i Përgjithshëm se kjo ishte në shkelje të ligji.

Gjatë funksionimit të tij 13-vjeçar, programi dha 6 mijë e 779 shtetësi – më shumë se gjysma e tyre për anëtarët e familjes së investitorëve.

Kreu i Komisionit dhe ish-presidenti i Gjykatës Supreme, Myron Nicolatos, tha se programi funksionoi gjatë gjithë jetës së tij “pa një kuadër ligjor dhe rregullator”, ndërsa nuk kishte “mbikëqyrje adekuate në lidhje me ligjet dhe rregulloret ekzistuese”.

Zbulimet penguan reputacionin e Qipros mes akuzave për korrupsion endemik dhe goditën qeverinë e Presidentit Nicos Anastasiades e cila kishte mbrojtur me zë të lartë programin.

Pasaportat nga Republika e Qipros mund të jenë të rëndësishme për individët nga vendet që e kanë të kufizuar hyrjen në Evropë, pasi Qiproja si një anëtare e BE-së i ofron mbajtësit të pasaportës qasje në udhëtime, punë dhe transaksione bankare falas në të gjithë 27 vendet anëtare.

Programi i investimeve ishte i popullarizuar në mesin e rusëve, ukrainasve dhe investitorëve nga Azia. Autoritetet qipriote u lëshuan pasaporta aplikantëve që plotësonin kërkesat minimale të investimit prej 2.15 milionë euro në ekonominë qipriote.

BE-ja që prej vitit 2013 bëri thirrje që programi të mbyllej dhe tashmë shfuqizimi i saj erdhi.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.