Pas aksidentit të autobusit të karantinës në Kinë, shfaqet zemërimi në mediat sociale

Në Kinë, në mesin e përdoruesve të mediave sociale është ndezur zemërim pasi 27 persona vdiqën kur një autobus që i transportonte në një strukturë karantine u rrëzua në provincën jugperëndimore të Guizhou.

Vdekjet në orët e para të së dielës u bënë shpejt një rrufe për kritikat ndaj qeverisë mbi politikat e saj për zero-COVID.

Përplasja e autobusit u bë shpejt tema kryesore në Weibo të dielën pasdite përpara se të zhdukej papritur nga 50 temat kryesore në trend.

Të paktën disa blogje të shpërndara gjerësisht dhe të zemëruara mbi këtë temë u fshinë nga WeChat menjëherë pas publikimit, por disa raporte dhe komente fillimisht mbetën, megjithëse shumë nga ato më kritike u hoqën nga Weibo.

Referuar policisë, përplasja e automjetit që mbante 47 persona ndodhi në një autostradë në provincën rurale Guizhou. Dhe se 20 persona po trajtohen për lëndime.

Fotot e shpërndara gjerësisht në mediat sociale treguan një autobus pasagjerësh ngjyrë floriri, me pjesën e sipërme të tij plotësisht të shkatërruar.

Më vonë, qeveria e Guizhou konfirmoi se automjeti kishte “transportuar njerëz të lidhur me epideminë në karantinë” nga kryeqyteti provincial i Guiyang, dhe se aksidenti ndodhi rreth orës 2:40 të mëngjesit të së dielës.

Pushteti vendor njoftoi se “puna e shpëtimit në vend ka përfunduar në thelb, trajtimi i të plagosurve dhe kujdesi i mëtejshëm i të ndjerit po kryhet në mënyrë të rregullt dhe shkaku i aksidentit është nën hetim”.

Nuk ishte e qartë nëse pasagjerët ishin të infektuar me COVID, kontakte të ngushta apo që jetonin në të njëjtën ndërtesë me pacientët me virus.

Politika zero-COVID shpesh ka parë komplekse të tëra strehimi me mijëra njerëz të zhvendosur në objektet e karantinës të ndërtuara me qëllim, ndonjëherë qindra kilometra larg.

Guizhou regjistroi 712 raste të reja të konfirmuara të shtunën, të cilat përbënin rreth 70 për qind të të gjitha rasteve të reja në Kinë dhe ishte një rritje e madhe nga 154 raste në provincë një ditë më parë.

Zyrtarët lokalë janë nën presion për të mbajtur nën kontroll shpërthimet, veçanërisht tani, në prag të kongresit të partisë në tetor.

Marrë nga “The Guardian”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.