Paraburgimi i Andrew Tate zgjatet për herë të katërt nga gjykata rumune

Një gjykatë rumune ka vendosur për herë të katërt të zgjasë me 30 ditë paraburgimin e Andrew Tate, influencuesit përçarës të mediave sociale.

Ai po mbahet nën dyshimin për krim të organizuar dhe trafikim njerëzor, sipas një zyrtari.

36-vjeçari, një shtetas britaniko-amerikan që ka 5.4 milionë ndjekës në Twitter, u arrestua fillimisht në fund të dhjetorit në kryeqytetin e Rumanisë, Bukuresht, së bashku me vëllain e tij, Tristanin dhe dy gra rumune.

Asnjë nga të katër nuk është paditur zyrtarisht.

Ramona Bolla, një zëdhënëse e agjencisë rumune kundër krimit të organizuar, DIICOT, ka thënë se një gjykatës në gjykatën e Bukureshtit ra dakord me një kërkesë të prokurorëve për të mbajtur të katër të arrestuarit ndërkohë që hetimet vazhdojnë.

Ata mund të mbahen për një maksimum prej 180 ditësh pa u paditur zyrtarisht.

Vendimi ka ardhur pasi një gjykatë e Bukureshtit javën e kaluar refuzoi një kërkesë për lirim me kusht nga Andrew Tate, i cili pritet të apelojë kundër zgjatjes, siç ka bërë kundër tre zgjatjeve të mëparshme 30-ditore, të cilat i humbi të gjitha.

Nëse humbasin një apel kundër vendimit të fundit, të katër do të qëndrojnë në paraburgim deri në fund të prillit.

Tate, një kikboksier profesionist që ka jetuar në Rumani që nga viti 2017, ishte ndaluar më parë nga platforma të ndryshme të mediave sociale për shprehje të pikëpamjeve mizogjene dhe gjuhës së urrejtjes.

Ai ka pohuar në mënyrë të përsëritur se prokurorët rumunë nuk kanë prova dhe pretendon se çështja e tyre është një komplot politik i krijuar për t’i mbyllur gojën.

DIICOT tha në një deklaratë pas arrestimeve të dhjetorit se kishte identifikuar gjashtë viktima në rastin e trafikimit të qenieve njerëzore, të cilat dyshohet se iu nënshtruan “akteve të dhunës fizike dhe detyrimit mendor” dhe të shfrytëzuara seksualisht nga anëtarët e grupit të dyshuar të krimit.

Sipas agjencisë, viktimat u joshën me pretendime dashurie dhe më vonë u frikësuan, u vunë nën vëzhgim dhe iu nënshtruan taktikave të tjera të kontrollit ndërsa detyroheshin të përfshiheshin në akte pornografike për përfitime financiare të grupit të krimit.

Marrë nga “The Guardian”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.