“Ajo që kemi parë nga KZQ-ja ka qenë e paprecedente. Si presidente, kam detyrimin të siguroj funksionimin kushtetues të institucioneve”.
Kjo ka qenë deklarata e presidentes në detyrë në Kosovë, Vjosa Osmani, pas vendimit të Komisionit Qendror të Zgjedhjeve, për mos certifikimin e listave të disa subjekteve politike për zgjedhjet e parakohshme që do të mbahen në 14 shkurt.
“U bë një presion marramendës dhe pati kërcënim politik ndaj KQZ-së”, deklaroi Osmani. “Unë kam detyrë të siguroj funksionimin kushtetues të institucioneve”.
Presidentja në detyrë theksoi faktin se zgjedhjet e 14 shkurtit, duhen mbajtur me çdo kusht. “Nuk duhet të biem në kurthet që ky proces të stërzgjatet. Qytetarët duhet të votojnë për atë kë përkrahin”, shtoi ajo.
Osmani i bëri thirrje anëtarëve të KQZ-së për paanshmëri. Ajo gjithashtu cilësoi se qytetarët duhet të ruajnë maturinë dhe të mbrojnë procesin zgjedhor. “Kemi kërkuar ndihmë edhe nga shtetet mike”, tha presidentja.
“Mbajtja e zgjedhjeve të lira është parakusht i funksionimit demokratik të vendit. Këtë test, duhet ta kalojmë të gjithë së bashku”.
Deklaratat e Osmanit vijnë pas vendimit të KQZ-së, për të mos certifikuar listat e kandidatëve të Lëvizjes Vetëvendosje (LVV), Aleancës për Ardhmërinë e Kosovës (AAK) dhe Nismës.
Një paralajmërim i mëparshëm është bërë nga institucioni zgjedhor, për pastrimin e listave të këtyre subjekteve. Sipas KQZ-së, pjesë të listave kanë qenë njerëz me dënime të formës së prerë në tre vitet e fundit.
Çfarë parashikon ligji për këto situata?
Problemi fillestar erdhi me heqjen e mandatit të deputetit Etem Arifi, nga Gjykata Kushtetuese. Vota e Arifit, ishte vendimtare për qeverinë Hoti, pasi me anë të saj, u fitua votëbesimi i Kuvendit.
Heqja e mandatit të Arifit, çoi në marrjen e vendimit për zgjedhje të parakohshme. Pas vendimit të Kushtetueses, presidentja në detyrë, Osmani, caktoi 14 shkurtin si ditë zgjedhore.
Arsyetimi për heqjen e mandatit të deputetit Arifi, ishte një vendim i formës së prerë që ai kishte marrë për veprën penale të mashtrimit me subvencione. Gjykata e Prishtinës e dha vendimin e formës së prerë në mars të vitit 2020.
Menjëherë kjo ngjalli debate në Kosovë, pasi kreu i LVV-së, Albin Kurti, ka një dënim nga Gjykata e Prishtinës në 2018-ën. Kjo, për përdorimin e gazit lotsjellës në Kuvend.
Duke iu referuar vendimit të Kushtetueses, kandidimi i Kurtit do të ishte i pamundur, për shkak të këtij vendimi. Vetë gjykata gjithsesi, në vendimin e plotë të ish-deputetit Arifi, del kontradiktore në atë çfarë thotë.
Në pikën 297 të vendimit, përcaktohet se një person nuk mund të kandidojë nëse është dënuar për vepër penale në tre vitet e fundit. Pavarësisht kësaj, një aktgjykim i 19 shtatorit të 2017-ës i Gjykatës Supreme, saktëson se në vendim, duhet të jetë e shkruar me vendim gjyqësor heqja e të drejtës për t’u zgjedhur.
Në mbyllje të arsyetimit, Kushtetuesja përfundon se vendimi për kandidimet ose jo, i takon KQZ-së.
Kalimi i Osmanit tek Vetëvendosje
Vjosa Osmani ka ndryshuar qëndrimin e saj politik që prej votimit të qeverisë Hoti. Ish-deputetja e Lëvizjes Demokratike të Kosovës (LDK), i doli kundër vendimit të partisë së saj, për t’u larguar nga koalicioni qeverisës me Albin Kurtin.
Nga ana tjetër, LDK-ja formoi një koalicion të ri, duke lënë LVV-në në opozitë. Osmani, Kryetare e Kuvendit të Kosovës, i doli kundër edhe kësaj lëvizjeje.
Ajo krijoi një front opozitar, duke mbajtur anën e Kurtit në Parlament. Një çast me rëndësi ishte dhe dorëheqja e Hashim Thaçit nga posti i Presidentit të Kosovës. Kjo, pas konfirmimit të aktakuzave për krime lufte nga Dhomat Speciale në Gjykatën e Hagës.
Posti i presidentes në detyrë, i kaloi sipas ligjit Vjosa Osmanit.
Me caktimin e zgjedhjeve të parakohshme, kryetarja e Kuvendit dhe njëkohësisht presidentja në detyrë, iu bashkua Albin Kurtit, duke vendosur emrin e saj, si numri dy i listës zgjedhore të LVV-së.
Mbetet tashmë për t’u parë lëvizja e radhës politike dhe institucionale në Kosovë. Çështja nëse deputetët do të lejohen ose jo të garojnë, është e ndërlikuar. Veçanërisht, çështja nëse Kurti, do të lejohet ose jo të kandidojë./AlbanianPost.com
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com-
Sylejman Selimi dhe Jahir Demaku lirohen nga akuza për krime lufte
-
Raportimi i AP-së për mospunësimin e katër specialistëve, Vitia: Do t’u bëhet zgjidhje sa më shpejtë
-
Gërvalla i quan “lotë të krokodilit” shqetësimet e opozitës për raportin e DASH-it
-
Nis takimi Bislimi – Petkoviç në Bruksel për dinarin
Lajmet kryesore
-
Nis takimi Bislimi – Petkoviç në Bruksel për dinarin
-
“Afera e ambalazhuesve”, Selmanaj: Prokuroria urgjentisht të fillojë çmontimin e kësaj skeme korruptive dhe kriminale
-
Miliarderët e botës duhet të paguajnë minimalisht 2% taksë mbi pasurinë, thonë ministrat e G20
-
SPAK nuk fillon procedim për Bardhin, pas kërkesës nga Olsi Rama