Në Evropë, thatësira më e madhe ndër dekada po godet shtëpitë, fabrikat, fermerët dhe transportin e mallrave në të gjithë kontinentin.
Ekspertët paralajmërojnë se dimrat më të thatë dhe verat e zjarrta nga ngrohja globale nënkuptojnë se mungesa e ujit do të bëhet “normaliteti i ri”.
Observatori Evropian i thatësirës ka llogaritur se 45 për qind e territorit të bllokut ka qenë nën paralajmërimin e thatësirës nga mesi i korrikut, me 13 për qind në alarm të kuq.
Madje, Komisioni Evropian paralajmëroi për një situatë kritike në rajone të shumta.
Në Francë, kryeministrja Élisabeth Borne aktivizoi një njësi krizash për të trajtuar një thatësirë të përshkruar si më e keqja e vendit që nga fillimi i regjistrimeve në vitin 1958.
Atje, mbi 100 komuna nuk kanë ujë të pijshëm dhe furnizohen me kamionë.
Me lagështinë e tokës sipërfaqësore më të ulëtën e regjistruar ndonjëherë dhe reshjet e korrikut 85 për qind më të ulëta se zakonisht, kufizimet e ujit janë në fuqi në 93 nga 96 departamentet kontinentale të vendit.
Sakaq, 62 janë të klasifikuara si “në krizë”.
Mes rritjes së çmimeve, ministri francez i bujqësisë paralajmëroi se korrja e misrit ka të ngjarë të jetë më shumë se 18 për qind më e ulët se vitin e kaluar.
Kurse sindikatat e fermerëve kanë thënë se mungesa e ushqimit të bagëtive si rezultat i thatësirës mund të çojë në mungesë të qumështit në vjeshtë dhe dimër.
Ndërmarrja e energjisë elektrike EDF u detyrua të reduktojë prodhimin nga një prej reaktorëve bërthamorë në Francën jugperëndimore për shkak të temperaturave të larta të ujit në lumin Garonne.
Po ashtu ka lëshuar shumë paralajmërime të ngjashme për reaktorët përgjatë Rhône.
Ngjashëm, rezervat ujore të Spanjës janë në nivelet më të ulëta të të gjitha kohërave dhe kanë rënë me një normë prej 1.5 për qind në javë përmes një kombinimi të rritjes së konsumit dhe avullimit.
Vendi ka marrë më pak se gjysmën e reshjeve të pritura për kohën e vitit për tre muajt e fundit.
Shumica e kufizimeve të ujit janë vendosur ndaj përdoruesve vendas, me autoritetet rurale që shpesh hezitojnë të frenojnë shfrytëzimin e shpeshtë të paligjshëm nga fermerët të një burimi gjithnjë e më të pakët.
Ky vit pritet gjithashtu të bëhet më i nxehti dhe më i thati i regjistruar ndonjëherë në Itali.
Një nga manifestimet më të spikatura të krizës është lumi Po i tharë.
Norma e prurjes së rrugës ujore më të gjatë të Italisë ka rënë në një të dhjetën e shifrës së zakonshme, ndërsa niveli i ujit është dy metra nën normalen.
Në fillim të korrikut, qeveria shpalli një emergjencë thatësire në pesë rajone veriore, duke racionalizuar ujin e pijshëm.
Por kriza nuk kufizohet vetëm në Evropën Jugore.
Nivelet e ujit kanë rënë gjithashtu në nivele të ulëta të rrezikshme në Rhine, një rrugë jetike e Evropës veriperëndimore e përdorur për transportin e naftës, benzinës, qymyrit dhe lëndëve të tjera të para që lidh zemrën industriale të Gjermanisë me portet kryesore të Roterdam-it dhe Antwerp-it.
Tanimë, thatësira ka goditur rrugët ujore gjermane ashtu si anijet e mallrave supozohet të transportojnë sasi të shtuara të qymyrit për t’i shërbyer termocentraleve.
Në Berlin, autoritetet kanë regjistruar rënie të nivelit të ujit në shumë liqene të ushqyer nga lumi Spree. Në qytetin jugor të Nuremberg-ut, pemët e thara po ujiten nga pishinat e brendshme komunale të mbyllura për të kursyer gaz.
Kurse në Zvicër industria e qumështit është goditur më rëndë.
Autoriteteve në Fribourg, Jura dhe Neuchâtel u është dashur të hapin livadhet e luginës që zakonisht nuk përdoren për kullotje deri në shtator, pasi kullotat në male ishin shumë të thata.
Edhe Holanda ka deklaruar një mungesë zyrtare të ujit javën e kaluar.
Qeveria nuk ka vendosur ende kufizime për konsumin familjar, por u ka kërkuar njerëzve të mendojnë me kujdes nëse duhet të lajnë makinën e tyre apo të mbushin plotësisht një pishinë.
Ndërkohë, në Belgjikën fqinje, parashikuesit kanë raportuar korrikun më të thatë që nga viti 1885.
Pavarësisht nga ndalimi i fermerëve që pompojnë ujë për të mbjellat, nivelet e ujërave nëntokësore në Flanders janë jashtëzakonisht të ulëta duke shkaktuar tharjen e tokave.
Kanalet dhe lumenjtë janë gjithashtu në gjendje të keqe.
Marrë nga “The Guardian”, përshtatur për “Albanian Post”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
