Ish kampioni i padiskutueshëm i peshave të mesme, Marvin Hagler, ndryshe i njohur me nofkën e tij “Marvelous” (i mrekullueshmi), vdiq në moshën 66 vjeç.
Bashkëshortja e tij, Kay Hagler, njoftoi vdekjen e Marvin-it të shtunën nëpërmjet fan club-it “Marvin Hagler” në Facebook:
“Më vjen keq për këtë njoftim të trishtë që do të përcjell: sot, fatkeqsisht, bashkëshorti im i dashur u largua nga jeta papritur në shtëpinë e tij në New Hampshire”, shkruan Kay.
Hagler e ka dominuar kategorinë e peshave të mesme në fillim të viteve 1980 por, një vit përpara se të tërhqej, në 1987 u rrëzua nga froni i tij pas një ndeshje mjaft të diskutueshme në të cilën Sugar Ray Leonard fitoi.
Hagler, mëngjerash nga New Jersey i SHBA-ve, ka pësuar vetëm një nokdaun [K.D./Knock Down] gjatë gjithë karrierës së tij dhe e ka mbrojtur titullin e kampionit të peshave të mesme plot 12 herë.
Duelet historike të Hagler
Në shtator 1980, Hagler u ndesh me Alan Minter në stadiumin “Wembley”, në Londër të Mbretërisë së Bashkuar. Hagler fitoi me pezullim të ndeshjes nga arbitri në raundin e tretë. Kjo pasi Minter kishte shumë gjakderdhje në fytyrë në sajë të një të çare të shkaktuar nga një prej grushtave të mprehtë të Hagler.
Në 1985 Hagler u përball me Thomas Hearns në “Ceaser Pallace” të Las Vegas-it, SHBA. Mëngjerashi nga New Jersey fitoi me nokout [K.O./Knock Out], në tre nga raundet më të famshme në historinë e boksit. Ndeshja ishte kaq intensive nga të dyja palët; Hagler dhe Hearns, saqë mori emrin “Lufta”.
Në 1988, pasi u mposht Sugar Ray Leonard në një ndeshje mjaft të diskutuar sa i përket meritës së fitores, Hagler u tërhoq përfundimisht nga boksi me rekordin 62 F – 2 H – 3 B.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com